Ration Card: स्वस्त धान्य दुकानदारांना सरकारकडून एक कोटी रुपये येणे बाकी आहे. शिवाय सरकारने कार्डधारकांना मोफत धान्य दिले. मात्र, ते धान्य नागरी पुरवठा खात्याच्या गोदामांतून आणताना वाहतूक व मजुरीचा खर्च दुकानमालकांना सोसावा लागला.

ही रक्कमही अदा केलेली नाही. जोपर्यंत ही रक्कम सरकार देत नाही, तोपर्यंत नोव्हेंबरचा कोटा उचलला जाणार नसल्याचा निर्णय आजच्या बैठकीत घेण्यात आला. या निर्णयामुळे ऐन दिवाळीत रेशन कार्डधारकांना स्वस्त धान्याचा पुरवठा होणार नसल्याची भीती व्यक्त करण्यात येत आहे.

अखिल गोवा रास्त धान्य दुकानमालक संघटनेची आज वार्षिक सभा मडगावात झाली. या बैठकीत विविध निर्णय घेण्यात आले. रास्त धान्य दुकानदारांची थकबाकी देण्याचा प्रश्र्न विधानसभेत आमदार विजय सरदेसाई आणि वेन्झी व्हिएगस यांनी उपस्थित केला होता.

मात्र, आता सात महिने झाले तरी अजून ही रक्कम दिली नसल्याचे गांधी यांनी सांगितले. सरकारने राष्ट्रीय अन्न सुरक्षा कायद्याचे पालन करताना धान्याचा कोटा रास्त धान्य दुकानांपर्यंत पोहोचविण्याची मागणी या बैठकीत केली. तालुका स्तरावर दुकानमालकांची समिती स्थापन करण्याचा निर्णयही घेण्यात आला.