रणजी करंडक क्रिकेट स्पर्धेत गोव्याची एलिट ‘क’ गटातील मोहीम त्रिपुराविरुद्धच्या लढतीने शुक्रवारपासून (ता. ५) सुरू होणार आहे. आगरतळा येथे खेळल्या जाणाऱ्या या चार दिवसीय सामन्यासाठी गोवा क्रिकेट असोसिएशनने सोमवारी १५ सदस्यीय संघ जाहीर केला.

अष्टपैलू दर्शन मिसाळ कर्णधारपदी कायम असून दीपराज गावकर याला उपकर्णधारपदी बढती मिळाली. डावखुरा फिरकी गोलंदाज अमूल्य पांड्रेकर, यष्टिरक्षक समर दुभाषी, वेगवान गोलंदाज हेरंब परब यांनी पुनरागमन केले.

गतमोसमातील पाच जणांची निवड नाही

गतमोसमात (२०२२-२३) मोसमात रणजी क्रिकेट स्पर्धेत खेळलेल्या एकूण पाच जणांना त्रिपुराविरुद्धच्या सामन्यासाठी गोव्याच्या संघात स्थान मिळालेले नाही. यामध्ये अनुभवी फलंदाज अमोघ देसाई व सुमीरन आमोणकर, वेगवान गोलंदाज फेलिक्स आलेमाव व ऋत्विक नाईक, फिरकी गोलंदाज शुभम देसाई यांचा समावेश आहे.

संघात तिघे पाहुणे खेळाडू

गोव्याच्या रणजी करंडक संघात डावखुरा वेगवान अर्जुन तेंडुलकर याच्यासह महाराष्ट्राचा फलंदाज राहुल त्रिपाठी, कर्नाटकचा यष्टिरक्षक-फलंदाज के. व्ही. सिद्धार्थ असे तिघे पाहुणे क्रिकेटपटू आहेत.

त्रिपुराविरुद्धच्या सामन्यासाठी गोव्याचा संघ

ईशान गडेकर, मंथन खुटकर, सुयश प्रभुदेसाई, राहुल त्रिपाठी, के. व्ही. सिद्धार्थ, स्नेहल कवठणकर, दर्शन मिसाळ (कर्णधार), दीपराज गावकर (उपकर्णधार), मोहित रेडकर, समर दुभाषी, अर्जुन तेंडुलकर, विजेश प्रभुदेसाई, लक्षय गर्ग, हेरंब परब, अमूल्य पांड्रेकर.