डिचोली: डिचोलीतील मये गावचे सुपूत्र तथा माजी सभापती आणि माजी मंत्री आदरणीय राजेंद्र आर्लेकर (Rajendra Arlekar) यांची हिमाचल प्रदेशच्या राज्यपालपदी (Governor of Himachal Pradesh) नियुक्ती झाल्याबद्दल मये गावात आनंदमय वातावरण पसरले आहे. मये गावासाठी हा अभिमानास्पद तेवढाच 'सोनेरी' क्षण असल्याच्या प्रतिक्रिया गावात व्यक्त होत आहेत.

दरम्यान, मये भू -विमोचन नागरिक कृती समितीचे सचिव प्रा. राजेश कळंगुटकर, माजी सरपंच सखाराम पेडणेकर, अशोक गावकर, रोहिदास वायंगणकर, कालिदास कवळेकर यांच्यासह पिळगावचे माजी सरपंच रामचंद्र गर्दे यांनी बुधवारी वास्को येथे श्री. आर्लेकर यांच्या निवासस्थानी त्यांची भेट घेतली.

राज्यपालपदी नियुक्ती झाल्याबद्दल आदरणीय राजेंद्र आर्लेकर यांचे अभिनंदनही या कार्यकर्त्यांनी केले. त्यांना पुढील वाटचालीस शुभेच्छा देत प्रेमाचे प्रतीक म्हणून विघ्नहर्त्या गणरायाची मूर्ती भेट दिली. राजेंद्र आर्लेकर यांची राज्यपालपदी नियुक्ती ही मयेतील जनतेसाठी भूषणावह अशी घटना आहे. असे मत प्रा. राजेश कळंगुटकर आणि रामचंद्र गर्दे यांनी व्यक्त केले.