Goa Rain Updates : गोव्यात शुक्रवार आणि शनिवारी काही भागात पावसाची शक्यता वर्तवण्यात आली आहे. गोवा वेधशाळेद्वारे गडगडाटासह हलक्या ते मध्यम स्वरुपाच्या पावसाचा अंदाज वर्तवला आहे. पूर्वेकडील वाऱ्यांमुळे गोव्यात मध्य-ट्रोपोशियरमध्ये आर्द्रता वाढल्याने राज्यात पावसाची शक्यता आहे. त्यामुळे पुढील दोन-तीन दिवसांत किमान तापमानात 2 अंश सेल्सिअसने वाढही होऊ शकते, असं हवामान खात्याकडून सांगण्यात आलं आहे.

गोव्यात सध्या वातावरण काहीसं ढगाळ पाहायला मिळत आहे. शेजारीच असलेल्या सिंधुदुर्ग जिल्ह्यात पावसाने दमदार हजेरी लावली होती. मात्र गोव्यात तितकासा पाऊस पाहायला मिळाला नव्हता. दुसरीकडे गोव्यात सध्या कडाक्याची थंडीही सुरु झाली आहे. त्यामुळे सकाळी थंडी आणि दुपारी कडाक्याचं ऊन अशा प्रकारचं वातावरण गोव्यात पाहायला मिळत आहे. त्यातच आता पावसाची हजेरी लागण्याची शक्यताही वर्तवण्यात आली आहे.

बंगालच्या उपसागरात कमी दाबाचा पट्टा निर्माण झाल्याने मागच्या गोव्यात सध्या ढगाळ वातावरण पाहायला मिळत आहे. त्यातच मागच्या आठवड्यात वास्कोत अचानक पावसाची रीपरीप सुरू झाली. या पावसामुळे रस्ते निसरडे झाल्याने वास्कोत एचडीएफसी बँकेसमोर सहा दुचाक्या घसरून पडल्या. यात दुचाकीचालक किरकोळ जखमी झाले. रस्ता निसरडा झाल्याने अग्निशमन दलाला पाचारण करण्यात आलं. अग्निशमनच्या जवानांनी निसरड्या रस्त्यावर माती टाकत वाहन चालकांना कमी वेगात जाण्याचा सल्ला दिला.