राज्यात हलका ते मध्यम स्वरुपाच्या पावसाची शक्यता असल्याचा अंदाज गोवा वेधशाळेने वर्तवला आहे. वेधशाळेने वर्तवलेल्या अंदाजानुसार 12.13,14, 15 सप्टेंबर रोजी राज्यात बहुतेक ठिकाणी पाऊस असणार आहे.

गणेश उत्सव साजरा झाला अन् पावसाने जोर धरल्याने नागरिकात काहीसे समाधानाचे वातावरण असले तरी गेल्या दोन ते तीन दिवसात राज्यातील काही भागात पावसाचा जोर अधिकच वाढला आहे. त्यामूळे काहीसे जनजीवन विस्कळीत झाल्याचे चित्र आहे. जुलैच्या शेवटपासून ऑगस्ट महिन्यात कमी झालेला पाऊस, गेल्या काही दिवसांपासून पुन्हा सक्रिय झाला आहे.

सर्वाधिक पाऊस जुलै महिन्यामध्ये

आतापर्यंतच्या नोंदीनुसार सर्वाधिक पाऊस जुलै महिन्यामध्ये झाला असून 5 जुलैला तो 156.2 मिलिमीटर तर 8 जुलैला या वर्षातला सर्वाधिक म्हणजे 161.7 मिलिमीटर कोसळला. मात्र, पुढे 18 जुलैपासून पावसाची गळती सुरू झाली. आणि तो 7 सप्टेंबरपर्यंत सरासरीपेक्षा कमीच होता.

ऑगस्ट महिन्यातला यावर्षीचा पाऊस तर अलीकडील काळातला सर्वात कमी पाऊस आहे. 6 ऑगस्ट रोजी झालेला 40.5 मिमी आणि 9 ऑगस्ट रोजी झालेला 37.2 मिमी पाऊस वगळता संपूर्ण ऑगस्टमध्ये सरासरीपेक्षा अत्यंत कमी पाऊस पडला. त्यातही 29 आणि 30 जुलैला सर्वात अत्यल्प पावसाची नोंद झाली.