डिचोली, मुसळधार पावसामुळे शेती पाण्याखाली येताना डिचोलीतील मयेसह काही भागात वरती आलेल्या ‘तरव्या’ चा धूप झाला आहे.

पावसामुळे ‘रुजून’ वर आलेला ‘तरवा’ वाहून गेला असून, मोठ्या जोमाने शेतीत उतरलेल्या बळीराजावर कपाळावर हात मारायची पाळी आली आहे. ‘मुळाक खाजन’ ही शेती पाण्याखाली आल्याने शेतकऱ्यांना मोठा फटका बसला आहे.

तरव्याची पूर्ण नासाडी झाली आहे. शेतकऱ्यांची मेहनत आणि आतापर्यंत खर्च केलेले पैसेही वाया गेले आहेत. शेतकऱ्यांना आता नव्याने तरव्याची पेरणी करावी लागणार आहे. जोरदार पावसाने शेतकऱ्यांची चिंता वाढवली आहे.

आता बियाणेही मिळत नाहीत

बियाणे आणि तरवा रुजत घालण्यासाठी प्रत्येक शेतकऱ्यांना किमान आठ ते दहा हजार खर्च आलेला होता. पुन्हा तरवा पेरावा लागणार आहे. आता बियाणेही मिळत नाही, अशी खंत नागेश नाईक गावकर, शेखर शिरोडकर आदी शेतकऱ्यांनी व्यक्त केली आहे. कृषी खात्याने शेतकऱ्यांना आधार द्यावा, अशी मागणी या शेतकऱ्यांनी केली आहे.