Goa Professional League Football: प्रतेश शिरोडकर याने नोंदविलेल्या निर्णायक पेनल्टी गोलच्या बळावर कळंगुट असोसिएशनने प्रोफेशनल लीग फुटबॉल स्पर्धेत मंगळवारी सलग दुसऱ्या विजयाची नोंद केली. त्यांनी कुठ्ठाळी व्हिलेजर्स क्लबला 1-0 असे निसटते हरविले.

सामना म्हापसा येथील धुळेर स्टेडियमवर झाला. सामन्याच्या 87 व्या मिनिटास कर्णधार प्रतेशने नोंदविलेल्या पेनल्टी गोलमुळे कळंगुटने सलग दुसऱ्या लढतीत पूर्ण तीन गुण प्राप्त केले. अगोदरच्या लढतीत पणजी फुटबॉलर्सला नमविलेल्या संघाचे आता सहा गुण झाले आहेत.

स्पर्धेत प्रथमच खेळणाऱ्या कुठ्ठाळी व्हिलेजर्सने पुन्हा एकदा प्रतिस्पर्ध्यांना झुंजविले. धेंपो क्लबविरुद्ध 1-2 असे निसटते पराभूत झालेल्या कुठ्ठाळीच्या संघाला मंगळवारी दुसऱ्यांदा हार पत्करावी लागली.

सामन्यातील तीन मिनिटे बाकी असताना कुठ्ठाळी व्हिलेजर्सच्या ज्योलिस्टन रिबेलो याने पेनल्टी क्षेत्रात चेंडू हाताळण्याची चूक केली. त्यानंतर पेनल्टी फटक्यावर प्रतेश याने अचूक नेम साधला. कुठ्ठाळीचा क्लाईव्ह मिरांडा सामन्याचा मानकरी ठरला.

स्पर्धेत बुधवारी (ता. 6) सेझा फुटबॉल अकादमी आणि गार्डियन एंजल स्पोर्टस क्लब यांच्यात धुळेर स्टेडियमवर सामना होईल.