पणजी: राज्यात यंदा मान्सूनोत्तर कालावधीत ऑक्टोबर महिन्यात सरासरी १४ इंच इतक्या पावसाची नोंद करण्यात आली, जी ऑक्टोबरमध्ये पडणाऱ्या मान्सूनोत्तर पावसाच्या तुलनेत विक्रमी तब्बल १२१ टक्के अधिक पाऊस असल्याचे गोवा वेधशाळेने म्हटले आहे.

राज्यात सर्वसामान्यपणे मुरगाव तालुक्यात इतर तालुक्यांच्या तुलनेत कमी पावसाची नोंद होते; परंतु मान्सूनोत्तर पावसात यंदा तब्बल १९.१५ इंच इतक्या सर्वाधिक पावसाची नोंद मुरगावात करण्यात आली आहे. राज्यात यंदा मार्चच्या शेवटच्या आठवड्यात गोव्यात मान्सून दाखल झाला, तो ऑक्टोबरच्या पहिल्या आठवड्यापर्यंत पाऊस पडत होता.

राज्यातील मान्सूनपूर्व, मान्सून आणि मान्सूनोत्तर पाऊस पाहता आतापर्यंत यंदा राज्यात सरासरी १६२.४८ इंच इतक्या पावसाची नोंद केली आहे. दरम्यान, शुक्रवारपासून (ता. ३१) राज्यात तुरळक पावसाची शक्यता गोवा वेधशाळेने वर्तविली आहे.

सर्वाधिक मान्सूनोत्तर पाऊस

गोव्यात २०१९ साली मान्सूनोत्तर तब्बल ५८८.५ मिमी म्हणजेच २३.१६ इंच इतक्या पावसाची नोंद करण्यात आली होती, जो सरासरी मान्सूनोत्तर पावसाच्या तुलनेत १८० टक्के अधिक होता. हा त्यावर्षीचा देशातील सर्वाधिक मान्सूनोत्तर पाऊस पडण्याच्या आकडेवारीतील सर्वाधिक पावसापैकी एक होता.

यंदाचा एकूण पाऊस

मिमी इंच

मान्सूनपूर्व ६३० २४.८१

मान्सून ३१३५ १२३.३८

मान्सूनोत्तर ३६२ १४.२६

एकूण ४१२७ १६३.४८