Porvorim Accidental Death पर्वरी येथील फुटसाल अरेना येथे मित्रांसोबत क्रिकेट खेळत असताना अचानक खाली कोसळल्याने 27 वर्षीय युवकाचा मृत्यू झाला. राज रवींद्रनाथ नार्वेकर (रा. धुळेर, म्हापसा) असे या मृत युवकाचे नाव आहे. उत्तरीय तपासणीनंतर मृतदेह नातेवाईकांच्या ताब्यात देण्यात आला.

पुंडलिकनगर, येथील फुटसाल अरेना मैदानावर शुक्रवारी रात्री ९.३० च्या सुमारास राज क्रिकेट खेळण्यासाठी गेला होता. तेथे राजला अस्वस्थ वाटू लागल्याने तो मैदानाबाहेर आला. मित्रांनी त्याला पाणी पिण्यास दिले.

थोड्या वेळाने तो तिथेच बेशुद्धावस्थेत पडला. त्याला तातडीने जवळील खासगी इस्पितळात नेले. तेथील डॉक्टरांनी त्याला तपासले आणि गोमेकॉत नेण्याचा सल्ला दिला. गोमेकॉत दाखल केल्यानंतर तेथील डॉक्टरांनी त्यास मृत घोषित केले.

पर्वरी पोलिस अधिक तपास करत आहेत. राज नार्वेकर याने अभियांत्रिकी शिक्षण घेतले होते. तो येथील एका खासगी कंपनीत नुकताच नोकरीला लागला होता. त्याचे कुटुंब आल्तिनो-पणजी येथे वास्तव्यास होते. दहा वर्षांपूर्वी त्याच्या वडिलांचे हृदयविकाराच्या झटक्याने निधन झाले होते.