पणजी: आमदार कार्लुस फेरेरा यांच्याविरोधात पक्ष शिस्तभंग अंतर्गत कारवाई करावी अशा मागणीचे पत्र प्रदेशाध्यक्ष अमित पाटकरांनी प्रभारी माणिकराव ठाकरे यांना लिहले आहे. या पत्राची राज्याच्या राजकीय वर्तुळात जोरदार चर्चा सुरु असताना, कार्लुस फेरेरा यांनी मात्र हे पत्र हसण्यावारी घेतल्याचे दिसत आहे. फेरेरा यांनी हे कृत्य बालिश आणि इमॅच्युर असल्याचे म्हटले आहे.

कुडचडे येथे पक्षाने आयोजित केलेल्या कार्यक्रमाला दांडी मारुन फेरेरा यांनी भाजप आमदार आणि माजी मंत्री नीलेश काब्राल यांच्या वाढदिवसाला हजेरी लावली होती. फेरेरा वारंवार पक्षाच्या विरोधात कृत्य करत असल्याचे पाटकरांनी म्हणत त्यांच्याविरोधात शिस्तभंगाची कारवाई करावी, अशा मागणीचे पत्र पाटकरांनी प्रभारी माणिकराव ठाकरे आणि सचिव अंजली निंबाळकर यांना लिहले आहे. या पत्रामुळे काँग्रेसमधील धुसफूस समोर आली असल्याची चर्चा होत असून, कार्लुस यांनी मात्र ही तक्रार हसण्यावारी घेतली.

"मला शंका आहे की अशा तक्रारीचे पत्र खरचं प्रदेशाध्यक्ष अमित पाटकरांनी लिहले आहे. मी ते वाचले आणि हसलो, मला ते खूपच बालिश आणि इमॅच्युर वाटले. मला वाटत नाही आमचे प्रदेशाध्यक्ष एवढे बालिश असतील. असं काही होतं तर ते मला एक फोन करु शकले असते आणि विषय सुटला असता. शिस्तपालन समिती मला नोटीस बजावेल त्यावेळी योग्य ते उत्तर देईन. मी काहीही चुकीचे केलेले नाही," असे कार्लुस फेरेरा बाजू मांडतांना म्हणाले

कार्लुस फेरेरा पाटकरांनी लिहलेल्या पत्रावर शंका घेत असताना काँग्रेस प्रभारी माणिकराव ठाकरे आणि सचिव अंजली निंबाळकर यांनी मात्र तक्रार प्राप्त झाल्याची माहिती दिली आहे. पत्रात नमूद तक्रारीची चौकशी केल्यानंतर योग्य ती कारवाई केली जाईल, अशी माहिती दोघांनी दिली आहे. ठाकरे आणि निंबाळकर फेरेरा यांच्याशी संवाद साधतील आणि त्यानंतर निर्णय घेतला जाईल, असेही स्पष्ट करण्यात आले आहे.