पणजी : सासष्टीतील धर्मनिरपेक्ष मते फोडण्यासाठी काही नेत्यांना पुढे करून नवा राजकीय पक्ष स्थापन करण्यासाठी भाजपने १०० कोटी रुपयांची तरतूद केली आहे, असा गंभीर आरोप काँग्रेसचे प्रदेशाध्यक्ष गिरीश चोडणकर यांनी केला.

या आरोपासदंर्भात ‘गोमन्तक’ने विचारणा केली असता, ‘काही दिवस थांबा. मी ज्यांच्याविषयी बोलत आहे, त्यांची नावे एका महिन्याच्या आत स्पष्ट होतील आणि जनता त्यांना नाकारेल’ असा दावा चोडणकर यांनी केला.

भाजप आपल्या कामगिरीच्या बळावर मते मागू शकत नसल्याने धार्मिक ध्रुवीकरण आणि विरोधकांमध्ये फूट पाडण्यासाठी ‘प्रॉक्सी’ पक्ष उभे करण्याचे राजकारण करत आहे. सासष्टीतही धर्मनिरपेक्ष मतांचे विभाजन करण्यासाठी नव्या पक्षाचा प्रयत्न सुरू असल्याचा आरोप चोडणकर यांनी केला.

आगामी विधानसभा निवडणुकीत बंडखोर उमेदवारांमुळे मतांचे विभाजन होऊ शकते, या प्रश्नावर चोडणकर म्हणाले की, गोव्यातील जनता अशा राजकारणाला नाकारेल. राज्यातील जनमत लक्षात घेऊन काँग्रेसने आघाडी करण्याचा निर्णय घेतला असून विरोधी पक्ष आणि मित्रपक्षांना चर्चेसाठी निमंत्रणेपाठविण्यात आली आहेत.

भाजपचा पराभव करू इच्छिणाऱ्या प्रत्येकाचे आघाडीत स्वागत आहे, असे सांगताना त्यांनी पक्षात नव्या नेत्यांचे स्वागत केले जात असल्याचे नमूद केले. मात्र, नवीन सदस्यांना प्रवेश देताना स्थानिक गट समित्यांच्या नेत्यांना डावलले जाणार नसल्याचे चोडणकर यांनी स्पष्ट केले.

गोव्यातील जनतेने भाजपच्या ‘फूट पाडा आणि राज्य करा’ या राजकारणाची जाणीव ओळखली असून आगामी निवडणुकीत जनता सूज्ञपणे मतदान करून काँग्रेस आघाडीला स्पष्ट बहुमत देईल, असा विश्वास त्यांनी व्यक्त केला.