Vijay Sardesai: रोटरी क्लब मडगाव मिडटाऊनने आयोजित केलेल्या दोन दिवशीय नक्षत्राज महोत्सवाचे उद्‍घाटन फातोर्डेचे आमदार विजय सरदेसाई यांच्या हस्ते करण्यात आले. हा शालेय विद्यार्थ्यांसाठीचा महोत्सव रवींद्र भवनमध्ये 26 नोव्हेंबरपासून सुरू झाला. यात नृत्य, संगीत तसेच विविध सांस्कृतिक कार्यक्रमांचे आयोजन करण्यात आले आहे.

कार्यक्रमाच्या उद्‍घाटनानंतर विजय सरदेसाई म्हणाले की, अशा युवा महोत्सवातून नेते तयार व्हायला पाहिजेत. नेत्यांची सध्या समाजाला गरज आहे. असे महोत्सव आयोजित केल्याने वेगवेगळ्या शैक्षणिक संस्था, वेगवेगळ्या समाजातील विद्यार्थी एकत्र येतात. त्यातून ओळख वाढते, विचारांची देवाण घेवाण होते. परिणामी समाजालाही बळकटी प्राप्त होते.

विद्यार्थी संघटनांमध्ये राजकीय पक्षांचा हस्तक्षेप वाढला आहे. त्यामुळे विद्यार्थ्यांनी अन्यायाविरुद्ध लढण्याची मानसिकता ठेवावी. वर्ग नेत्याची निवडसुद्धा निवडणुकीद्वारेच व्हावी, असेही सरदेसाई म्हणाले.