Nuclear Plant In Goa

पणजी: केंद्रीय ऊर्जामंत्री मनोहरलाल खट्टर यांनी गोव्यात अणुऊर्जा प्रकल्प साकारणार असल्याचे काल सुतोवाच केल्यानंतर काँग्रेस तसेच आप, आरजी आदी पक्षांनी विरोध दर्शवला आहे. अमित पाटकर, अमित पालेकर, आमदार वीरेश बोरकर, मनोज परब यांनी आपल्या संतप्त भावना व्यक्त केल्या आहेत.

अमित पाटकर यांनी म्हटले आहे, गोव्यात आधीच निसर्गहानीने टोक गाठले आहे. अणुऊर्जा प्रकल्प गोव्यासाठी धोकादायक ठरू शकतो, कोणत्याही स्थितीत येथे स्थान मिळू देणार नाही. राज्य विजेसंदर्भात स्वयंपूर्ण नाही, असा हवाला देत मंत्री खट्टर यांनी अनेक मुद्दे मांडले. पैकी अणुऊर्जा प्रकल्प एक आहे.

"गोव्यात अणुऊर्जा प्रकल्प स्थापन करण्याचा केंद्रीय ऊर्जा मंत्री मनोहर लाल खट्टर यांचा प्रस्ताव म्हणजे भाजप सरकारचा गोव्याबाबत बेपर्वा, असंवेदनशील आणि विध्वंसक दृष्टिकोनाचं स्पष्ट दर्शन आहे. गोवा हा भाजपच्या धोकादायक प्रयोगांचा प्रयोगशाळा नाही आणि होणारही नाही", असे अमित पाटकर यांनी म्हटले आहे.

तरंगता प्रकल्प

ज्या अणुऊर्जा प्रकल्पासंदर्भात केंद्राकडून विचार होत आहे, तो तरंगता पद्धतीचा असून रशियाच्या सहकार्याने समुद्रात साकारला जाऊ शकतो. अशी संकल्पना अद्याप भारतात राबवण्यात आलेली नाही. मुख्यमंत्री प्रमोद सावंत यांनी 'योग्य तो अभ्यास करून पुढील विचार करू, असे कालच म्हटले आहे.