Margao: मडगावात 85 सीसीटीव्ही कॅमेरे लवकरच बसवणार, आमदार कामत यांनी दिली माहिती

Margao CCTV installation:सासष्टी: मडगावात ८० ते ,८५ सीसीटीव्ही कॅमेरे बसविणार अशी माहिती मडगावचे आमदार दिगंबर कामत यांनी या प्रतिनिधीला दिली. शनिवारी मडगावत पोलिस, नगरपालिका व संबंधित सरकारी खात्याच्या अधिकाऱ्यांची बैठक झाली व आयटीजीने दिलेल्या प्रस्तावावर सखोल चर्चा करण्यात आली.

आयटीजी ही सरकारने नियुक्त केलेली नोडल एजन्सी असून त्यांनी तीन प्रस्ताव समोर ठेवले होते. पहिला प्रस्ताव होता की, आयटीजी हे सीसीटीव्ही कॅमेरे बसवून देणार पण त्याचा व देखभालीचा खर्च पूर्णपणे नगरपालिकेने उचलावा.

दुसरा प्रस्ताव होता नगरपालिकेने साधन सुविधा उपलब्ध करून देणे व तिसरा प्रस्ताव होता सीसीटीव्ही बसविणे, देखभाल खर्च आयटीजी स्वत: करणार व जो महसूल येईल तो नगरपालिका व आयटीजीमध्ये विभागणे असा होता. आम्ही तिसऱ्या प्रस्तावाला मंजुरी दिली असून हे काम लवकरच टप्प्या टप्प्याने पूर्ण केले जाईल, असे कामत यांनी सांगितले.

द. गोवा जिल्हाधिकारी इमारतीत कंट्रोल रूम

आम्ही चतुर्थी पूर्वी कंपनीला न्यू मार्केट व परिसरात सीसीटीव्ही कॅमेरे बसविण्यास प्राधान्य देण्यास सांगितले आहे असे कामत यांनी सांगितले. या सीसीटीव्ही कॅमेऱ्यांचा कंट्रोल रूम दक्षिण गोवा जिल्हाधिकारी इमारतीत स्थापण्याचा विचार असल्याचेही त्यांनी सांगितले.