तिसवाडी: पहलगाम येथील दहशतवादी हल्ल्याच्या पार्श्वभूमीवर राज्यात ठिकठिकाणी 'कोम्बिंग ऑपरेशन' राबवले जात आहे. राज्यात सुरक्षा व्यवस्थेतही वाढ करण्यात आली आहे. संशयास्पद व्यक्तींची तपासणी केली जात आहे.

सांताक्रूझ मतदारसंघातील चिंबल, मेरशी आणि इंदिरानगर परिसरात जुने गोवे पोलिसांनी २५२ जणांची चौकशी करून २१ जणांना अटक केली. त्याशिवाय १२ जणांना ताब्यात घेतल्याची माहिती जुने गोवे पोलिस निरीक्षक सतीश पडवळकर यांनी दिली. केंद्रीय गृहमंत्री अमित शहा यांनी मुख्यमंत्री डॉ. प्रमोद सावंत यांना फोन करून सूचना दिल्यानंतर पोलिसांनी राज्यात ठिकठिकाणी प्रतिबंधात्मक कारवाई केली.

मुख्यमंत्र्यांनीही शनिवारपासून कोम्बिंग ऑपरेशन राबविले जाणार असल्याचे स्पष्ट केले होते. त्याचाच भाग म्हणून जुने गोवे पोलिसांनी सांताक्रुझ मतदारसंघातील संवेदनशील भागात जाऊन कारवाई केली आहे. राज्यात जे परप्रांतीय राहत आहेत त्यांच्याकडील ओळखपत्राची तपासणी केली जात आहे. संशयास्पद व्यक्ती आढळून आल्यास त्याची चौकशी केली जात आहे.

खोर्लीत गांजा जप्त, दोघांना अटक

जुने गोवे पोलिसांनी अमलीपदार्थ बाळगल्याप्रकरणी दोघांना अटक केली. त्यांच्याजवळील २.३५ लाखांचा गांजा जप्त केला. मळार-खोलीं येथे रेल्वे उड्डाणपुलाजवळून संशयित नीरज कुमार (३८, मूळ-बिहार) आणि उपेंद्र राम (४०, मूळ-बिहार) यांना रंगेहाथ पकडले. नीरज कुमारकडून १.०२० किलोग्रॅम, तर उपेंद्र रामकडून १.०१५ किलोग्रॅम गांजा जप्त करण्यात आला. पोलिसांनी अमलीपदार्थ विरोधी कायदा १९८५ अंर्तगत गुन्हा नोंद केला आहे.

रेल्वे स्थानकांवर तपासणी

पेडणे पोलिसांनी परिसरात गस्त वाढवली आहे. मालपे-पेडणे रेल्वे स्थानकावरील प्रवासी व पर्यटकांना सुरक्षा देऊन त्यांचा आत्मविश्वास वाढवणे तसेच संशयास्पद व्यक्तींची तपासणी करणे या उद्देशाने पेडणे पोलिस काम करीत आहेत. दुसरीकडे, कोकण रेल्वेच्या पोलिसांनीही मडगाव रेल्वे स्थानकावर तपासणी मोहीम राबविली