म्हापसा: राज्यात पर्यटन हंगाम तेजीत आहे. देश- विदेशातील पर्यटक गोव्यात दाखल होत असताना अमली पदार्थ तस्करी रोखण्याचे मोठे आव्हान पोलिसांसमोर आले. काही दिवसांवर येऊन ठेपलेल्या सनबर्न आणि थर्टी फर्स्टच्या पार्श्वभूमीवर राज्यात अवैध पद्धतीने अमली पदार्थ यायला सुरुवात झालीय.

म्हापसा पोलिसांनी अमली पदार्थ प्रकरणी मोठी कारवाई करत तब्बल दहा लाखांचे अमली पदार्थ जप्त करुन, पाच जणांना अटक केलीय. म्हापसा केटीसी बस स्थानक येथे पोलिसांनी गुरुवारी (१२ डिसेंबर) ही कारवाई केली.

म्हापसा पोलिसांनी चंदनकुमार मोहन मिस्त्री शर्मा (२२), रोहित रामराज विश्वकर्मा शर्मा (२१), इमतियाज मुस्लिम अन्सारी (२१) (सर्व रा. झारखंड) विजय प्रदीप वळवईकर (२५) आणि परशुराम शंकराप्पा लमाणी (३६) (दोघेही रा. कार्मुली, बार्देश) यांना अटक करण्यात आली आहे.

म्हापसा पोलिसांनी याप्रकरणी एनडीपीएस कायद्यांतर्गत गुन्हा नोंद केला आहे. संशयितांकडून १०.३०० किलोग्रॅम वजनाचा गांजा जप्त केला आहे. झारखंड येथून आलेले तीन जणांना गांजा पुढे गोव्यातील दोघांना विक्री करण्याचा त्यांचा प्लॅन होता. दरम्यान, पोलिसांनी यातील सर्व पाच जणांना अटक केलीय

राज्यात पर्यटन हंगाम तेजीत आहे, तसेच, येत्या काळात राज्यात पर्यटकांचा ओघ वाढणार आहे. नवीन वर्षाचे स्वागत आणि सनबर्न महोत्सवाच्या दरम्यान राज्यात अमली पदार्थ तस्करीचे प्रमाण वाढण्याची भीती असते. देश -विदेशातून तस्कर यावेळी सक्रिय होतात. दरम्यान, पोलिसांनी म्हापशातून मोठ्या प्रमाणावर गांजा जप्त केलाय. पण, पुढे देखील तस्करी रोखण्याचे आव्हान पोलिसांसमोर आहे.