Goa Police: राज्यात होत असलेल्या अपघातांची पोलिसांनी गंभीर दखल घेतली असून बेशिस्त वाहन चालकांविरोधात मोहीम सुरू केली आहे. गत दहा दिवसांत उत्तर गोव्यात 3522 बेशिस्त चालकांविरुद्ध दंडाची कारवाई केली आहे.

तर यापुढे वाहतूक व गर्दी व्यवस्थापन तसेच पाळत ठेवण्यासाठी ड्रोन कॅमेऱ्याचा वापर केला जाणार आहे. याकरिता तीन ड्रोन सरकारने मंजूर केले आहेत. पुढील दीड महिन्यात ते उपलब्ध होतील.

उत्तर गोवा पोलिस अधीक्षक निधीन वाल्सन म्हणाले की, पोलिसांनी महत्त्वांच्या पुलावर तसेच अधिक वर्दळ असलेल्या ठिकाणी सीट बेल्ट, हेल्मेट न वापरणे तसेच वाहन चालवताना मोबाईलवर बोलणाऱ्यांविरुद्ध कारवाई केली आहे. कर्कश आवाजाचे हॉर्न लावणाऱ्यांची वाहने ताब्यात घेऊन नव्या नियमानुसार कारवाई केली आहे.

नियमांचे उल्लंघन करणाऱ्यांविरुद्ध कठोर कारवाई हाच उपाय आहे. गेल्या काही दिवसांत घडलेले अपघात मानवी चुकीमुळे तसेच ओव्हरटेक करताना झाले आहेत.

अनेक दुचाकी चालक हेल्मेटचा वापर करत नसल्याने त्या परिसरातील पोलिस स्थानकांना कारवाईचे निर्देश देण्यात आले आहेत. म्हापसा, कोलवाळ, साळीगाव व डिचोली या भागात 300हून अधिक जणांविरुद्ध कारवाई झाली आहे. - निधीन वाल्सन, पोलिस अधीक्षक, उत्तर गोवा