मडगाव: मडगावात सराफाच्या दुकानातून सोने घेऊन पसार झालेल्या तीन कारागिरांना अटक करण्यात गोवा पोलिसांना यश आले आहे. पोलिसांना या घटनेची माहिती मिळताच त्यांनी त्वरित या प्रकरणाचा छडा लावायला सुरुवात केली आणि गुरुवारी (दि. ५ डिसेंबर) रोजी पसार झालेल्या आरोपींच्या हातात बेड्या ठोकण्यात पोलिसांना यश मिळाले आहे.

मडगावात सराफाच्या दुकानातून तिघा आरोपींनी हात सफाईचा जादू करत ७२ लाख रूपये किमतीचे सोने लंपास केले होते आणि याच चोरांच्या मागावर असलेल्या पोलिसांनी पश्चिम बंगालमध्ये दोघांना अटक करून गोव्यात आणले आहे. बाणावली येथील सराफी व्यावसायिक प्रितेश लोटलीकर यांच्याकडे हे तीन कारागीर कामाला होते. प्रितेश लोटलीकर यांच्याजवळ ते सोनं वितळवण्याचं काम करायचे, मात्र त्यांनी तब्बल ७२ लाखांचे सोने पळवत सोनाराला भला मोठा गंडा घातला.  

मडगावच्या कोंब भागात एकूण घटना घडली होती . सराफ प्रितेश लोटलीकर यांना अचानक ९५९ ग्रॅम सोने चोरीला गेल्याचे आढळून आले आणि दुकानात कामाला असलेले तिघेही सापडत नसल्याने लोटलीकर यांचा तिघांवरील संशय बळावला. यानंतर त्यांनी पोलिसांकडे तक्रार दाखल केली.

तिन्ही आरोपी पश्चिम बंगालचे असल्याने पोलिसांना ते बंगालला पळून गेल्याचा संशय होता आणि म्हणून शनिवारीच एक पोलीस पथक बंगालला रवाना झाले. पोलिसांनी अटक केलेल्या आरोपींची नावे सुप्रोकोश  मोंडल, संजय मोंडल व तपस जना अशी आहेत. या आरोपींपैकी एकाचा भाऊ गोव्यात रावणफोंडा येथे राहत असल्याने त्याची चौकशी केल्यानंतर आरोपींपर्यंत पोहोचणे पोलिसांसाठी सोपे झाले.