मडगाव: नुवे येथील घरफोडी प्रकरणात ‘पारधी गँग’ चा हात असल्याचे उघड झाले आहे. या टोळीतील एकाच्या गोवा पोलिसांनी मुंबईत मुसक्या आवळल्या आहेत. अर्जुन गायकवाड (२१) असे या संशयिताचे नाव आहे. बुधवारी त्याला गोव्यात आणण्यात आले.

या चोरीप्रकरणी गेल्या आठवड्यात मायणा कुडतरी पोलिसांनी दीपक बाबुराव मेंडके (२२) याला जालना (महाराष्ट्र) येथून पकडले होते. तो व्यवसायाने टॅक्सीचालक असून, चोरीसाठी त्याने वापरलेली ‘इनोव्हा’ पोलिसांनी जप्त केली होती.

त्याची कसून चौकशी केली असता, या घरफोडीत पारधी गँगचा सहभाग असल्याचे उघड झाले. एकूण सात जण या घरफोडीत गुंतले असल्याचे कळल्यानंतर पोलिसांनी वेगाने तपास सुरू केला. पोलिसांचे एक पथक आठवडाभर मुंबई व पुणे या भागात ठाण मांडून होते. याप्रकरणी अधिक तपास करण्यात येत आहे.

अर्जुन हा सराईत गुन्हेगार

अर्जुन हा सराईत गुन्हेगार असून, त्याच्याविरुद्ध घरफोड्या तसेच महाराष्ट्रातील विविध पोलिस ठाण्यात गंभीर गुन्हे नोंद असल्याची माहिती पोलिसांनी दिली. ११ जानेवारी रोजी नुवे येथे चोरीची वरील घटना घडली होती.