पणजी : एका १६ वर्षीय अल्पवयीन मुलीच्या अपहरणप्रकरणी मोठी कारवाई करत मायणा-कुडतरी पोलिसांनी संशयित आरोपीला महाराष्ट्रातील कोल्हापूरमधून अटक केली आहे. तसेच, पीडित मुलीची सुखरूप सुटका करण्यात पोलिसांना यश आले आहे.

जोशुआ बंडेवदार (१८) या संशयित आरोपीला ताब्यात घेतल्यानंतर पोलिसांनी त्याला गोव्यात आणलं असून, पीडितेला तिच्या कुटुंबाच्या स्वाधीन करण्यात आलं आहे.

मिळालेल्या माहितीनुसार, ७ मार्च रोजी दावर्ली येथील मारुती मंदिर परिसरातून १६ वर्षीय मुलगी अचानक बेपत्ता झाली होती. मुलगी बेपत्ता झाल्यानंतर तिच्या कुटुंबीयांनी मोठ्या प्रमाणावर शोध घेतला, मात्र ती सापडली नाही. त्यामुळं त्यांनी तातडीने मायणा-कुडतरी पोलीस ठाण्यात तक्रार दाखल केली.

तक्रार दाखल झाल्यानंतर पोलिसांनी तातडीनं तपासाला सुरुवात केली. माहितीच्या आधारे पोलिसांनी आरोपी जोशुआ बंडेवदारचा मागोवा घेतला. अखेर, पोलिसांनी कारवाई करत कोल्हापूरमध्ये जाऊन आरोपीला अटक केली. त्यावेळी पीडित मुलीचीही त्याच्या ताब्यातून सुटका केली.

न्हावेली येथील रहिवासी असलेला आरोपी जोशुआ बंडेवदार (१८) याला अटक करण्यात आली असून, त्याच्यावर गोवा बाल कायद्याच्या कलम ८ अंतर्गत गुन्हा दाखल करण्यात आला आहे.

या घटनेनंतर पोलिसांनी पालकांना सतर्क राहण्याचं आवाहन केलं आहे. तसंच, समाजमाध्यमांद्वारे अनोळखी व्यक्तीशी मैत्री करणे, अनोळखी व्यक्तींसोबत घराबाहेर जाणे यासारख्या धोकादायक गोष्टी टाळण्याचा सल्ला पोलिसांनी दिला आहे.