Goa police action mode On gambling activities : राज्यात पोलिसांनी विविध ठिकाणी जुगार अड्ड्यांवर टाकलेल्या छाप्यांमध्ये एकूण 28 जणांना अटक केली असून लाखो रुपयांसह जुगाराचे साहित्य जप्त केले.

कासावली येथील एका बार ॲण्ड रेस्टॉरंटमध्ये सुरू असलेल्या पत्त्यांच्या जुगार अड्ड्यावर पोलिसांनी छापा टाकून 15 जणांना अटक केली. यावेळी जुगार साहित्य तसेच २ लाख ७३ हजार ४०० रुपयांची रोकड जप्त करण्यात आली. संशयितांची नंतर वैयक्तिक जामिनावर सुटका करण्यात आली.

काणकोण पोलिसांनी गुळे येथे पत्त्याच्या जुगारी अड्ड्यावर छापा टाकून अड्डामालकासह चार जुगाऱ्यांना ताब्यात घेतले. पोलिसांनी जुगाऱ्यांकडून पत्ते व ८,४०० रुपयांची रोकड जप्त केली.

म्हापसा पोलिसांनी जुगार खेळणाऱ्या नऊ संशयितांना अटक केली. त्यांच्याकडून १२,९०० रुपये व जुगाराचे साहित्य जप्त केले.

पोलिसांनी टाकलेल्या पाच वेगवेगळ्या छाप्यांमध्ये संशयित अर्जुन गावडे (३८) विजयकुमार ओसवाल (५१), रमेश बुधाथोकी (२१), रोहित रॉय (२८), विजय साळुंके (३५) यांना अटक करून त्यांच्याकडून ५,९०० रुपये जप्त केले.

दुसऱ्या छाप्यात यश नाईक (२७), रवी लमाणी (३४), प्रकाश लमाणी (३०), पांडुरंग तेली (३९) यांच्याकडून ७ हजार रुपये व पत्त्याच्या जुगारांचे साहित्य जप्त केले.

पोलिसांनी एकूण ९ जणांविरुद्ध गुन्हा दाखल करून अटक केली. पोलिस उपअधीक्षक जीवबा दळवी यांच्या मार्गदर्शनाखाली पोलिस निरीक्षक सीताकांत नायक यांच्या नेतृत्वाखाली पोलिस पथकाने हा छापा टाकला.