Tilari Canal: तिळारी धरणाच्या कालव्याचे डागडुजीचे काम सुरू असून त्यासाठी 45 दिवस जातील. परंतु याचा पिण्याच्या पाण्यावर परिणाम होणार नाही; कारण पाण्याची पर्यायी व्‍यवस्था केली आहे.

साळ येथून पाणी पंप करून आमठाणे धरणात व आमठाणेतून अस्नोडा जलशुद्धीकरण प्रकल्पात सोडण्यात येत आहे, अशी माहिती जलस्रोत खात्याचे कार्यकारी अभियंता केशव देशपांडे यांनी दिली.

बार्देश तालुक्यासाठी अस्नोडा जलशुद्धीकरण प्रकल्पातून पिण्याचा पाणीपुरवठा केला जात आहे. त्यामुळे पाण्याची टंचाई होणार नाही यासाठी खाते काळजी घेत आहे. तसेच पेडणे तालुक्यात पाणी चांदेल येथून घेतले जाणार आहे, असे देशपांडे म्हणाले.

तिळारी धरण महाराष्ट्रात असल्याने कालव्याच्या कामाचा खर्च महाराष्ट्र करणार आहे. कालव्याच्या डागडुजीचे काम वेळेत पूर्ण करण्यासाठी प्रयत्न सुरू आहेत. 45 दिवसांत ते पूर्ण केले जाईल, अशी आशा आहे, असे देशपांडे म्हणाले.