Goa Tourism: गोव्याच्या पर्यटन क्षेत्रातील वेगवेगळ्या विकास प्रकल्पांना केंद्र सरकारच्या सर्वतोपरी सहकार्याचे आश्वासन केंद्रीय पर्यटनमंत्री जी. किशन रेड्डी यांनी दिले आहे. राज्याचे पर्यटनमंत्री रोहन खंवटे यांनी नुकतीच त्यांची दिल्लीत भेट घेऊन राज्यातील पर्यटन क्षेत्राच्या विकासाबाबत सकारात्मक चर्चा केली.

राज्यातील खाण व्यवसाय ठप्प झाल्यानंतर पर्यटन व्यवसाय हा गोव्याच्या अर्थव्यवस्थेचा मुख्य आधार ठरला आहे. कोविड महामारीनंतर राज्याच्या अर्थव्यवस्थेची विस्कटलेली घडी पुन्हा बसविण्यासाठी पर्यटन क्षेत्र महत्त्वाचे ठरले आहे. अशावेळी येथील पर्यटनाभिमुख प्रकल्पांना चालना देणे आवश्यक ठरल्याचे खंवटे यांनी रेड्डी यांच्या निदर्शनास आणून दिले.

गोव्याने जगाच्या पर्यटन नकाशावर आपली वेगळी छाप उमटविली आहे. भारतात येणारे विदेशातील पर्यटकांची पावले गोव्याकडे वळल्याशिवाय राहता नाहीत. शिवाय देशी पर्यटकांचा लोंढा देखील आता गोव्याकडे आकर्षित होत असून अशावेळी राज्यात नव्या पर्यटन प्रकल्पांची मुहूर्तमेढ रोवणे किती गरजेचे आहे, यावरही केंद्रीय मंत्री रेड्डी व राज्याचे मंत्री खंवटे यांच्यात चर्चा झाली.

आध्यात्मिक पर्यटनावर भर

राज्य सरकारच्या नव्या पर्यटन प्रकल्पांच्या प्रस्तावांची रेड्डी यांना कल्पना दिली. नजीकच्या काळात हे प्रस्ताव केंद्राकडे पाठविण्यात येतील व राज्याच्या पर्यटन क्षेत्राला नवी उभारी देण्याचा सरकारचा प्रयत्न असेल.

इको पर्यटनासह साहसी व जलक्रीडा पर्यटन, आध्यात्मिक पर्यटनावर राज्य सरकार लक्ष केंद्रित करत असून केंद्राच्या सहकार्यामुळे लवकरच राज्याच्या पर्यटन क्षेत्रात मोठी क्रांती घडेल, असा विश्वास खंवटे यांनी व्यक्त केला.