खारीवाडा-वास्को येथील घाऊक मासळी मार्केटमधील व रस्त्याच्या कडेला मोक्याच्या ठिकाणी बसून मासळी विक्री करणाऱ्या लमाणी मासळी विक्रेत्यांचा व्यावसाय तेजीत चालला असून याचा मासळी मार्केटमधील विक्रेत्यांच्या व्यावसायावर परिणाम होत आहे.

तसेच पालिका मुख्याधिकारी व नगराध्यक्ष यांनी मार्केटमधील मासळी विक्रेत्यांना दिलेला शब्द न पाळल्यामुळे मासळी मार्केटमधील मासळी विक्रेत्या महिलांनी सोमवारी (ता.१५) पुन्हा पालिकेत येऊन नगराध्यक्षांना घेराव घालून जाब विचारला व घाऊक मासळी विक्रेते व रस्त्यावर बसून मासळी विक्री करणाऱ्या लमाणी महिला विक्रेत्यांवर जर कारवाई होत नाही तर आम्ही पालिकेसमोर बसून मासळी विक्री करणार असल्याचा इशारा नगराध्यक्षांना दिला आहे.

मासळी मार्केटमधील मासळी विक्रेत्या व घाऊक मासळी विक्रेते तसेच रस्त्याशेजारी मोक्याच्या ठिकाणी बसून मासळी विक्री करणाऱ्या लमाणी मासळी विक्रेत्यांमधील शीतयुद्ध अजून संपत नाही. वास्कोतील नियोजित मासळी मार्केट प्रकल्प होण्यास विलंब लागला तो या मासळी विक्रेत्यांमुळे. खारीवाडा येथील घाऊक मासळी विक्रेत्यांनी आपला व्यावसाय पुन्हा थाटल्याने याठीकाणी मासळी खव्वयांची गर्दी वाढत आहे.

म्हणून प्रकल्प रखडला

खारीवाडा येथील घाऊक मासळी विक्रेत्यांमुळे आमच्या व्यवसायावर परिणाम होत आहे. तसेच रस्त्यावर बसून मासळी विक्री करणाऱ्या लमाणी मासळी विक्रेत्यांचाही उच्छाद वाढत आहे. या दोन्ही विक्रेत्यांवर कारवाई करा व त्यांचा व्यवसाय बंद करा तेव्हाच मासळी मार्केट प्रकल्पाला हात घाला अन्यथा आम्ही हा प्रकल्प होऊ देणार नाही, असा आग्रह मासळी मार्केटमधील महिला मासळी विक्रेत्यांनी वारंवार धरला व हा प्रकल्प रखडत गेला.