मडगाव: हॉटेलमधून निर्माण होणाऱ्या सांडपाण्याची विल्हेवाट लावण्यात हलगर्जीपणा केल्याने जिल्हा प्रशासनाने दालमिया कंपनीच्या मोबोर-केळशी येथील ‘द बाईक रिसॉर्ट’ या तारांकित हॉटेलच्या तब्बल ११० खोल्यांना टाळे ठोकले.

सासष्टीचे मामलेदार विमोद दलाल यांच्या देखरेखीखाली ही कारवाई करण्यात आली. प्रदूषण नियंत्रण मंडळाच्या आदेशानुसार ही कारवाई केल्याची माहिती दलाल यांनी दिली. या हॉटेलला (Hotel) पूर्वी ‘ओल्ड ॲंकर’ या नावाने ओळखले जात होते. या हॉटेलचा परवाना संपल्याने या परवान्याच्या नूतनीकरणासाठी हॉटेलतर्फे अर्ज केला होता.

मात्र, हॉटेलची तपासणी केली असता तेथील सांडपाणी प्रक्रिया प्रकल्प नादुरुस्त असल्याचे आढळून आले. या हॉटेलचे सांडपाणी उघड्या नाल्यात सोडल्याचे दिसून आल्यामुळे ही कारवाई केल्याची माहिती प्रदूषण नियंत्रण मंडळाचे अध्यक्ष महेश पाटील यांनी दिली. या हॉटेलला यापूर्वीही प्रदूषण नियंत्रण मंडळाने कारणे दाखवा नोटीस बजावली होती.