NCC Training Camp हरमल पंचक्रोशी हायस्कूल हरमल पेडणे येथे आयोजित नौदलाच्या 10 दिवसीय एनसीसी वार्षिक प्रशिक्षण शिबिरात आयडियल हायस्कूल पिळगाव डिचोलीच्या कु. गौतमी चोडणकर हिने ज्युनियर विंग (मुली) गटात नेव्ही विंगची सर्वोत्कृष्ट एनसीसी कॅडेट होण्याचा मान पटकावला.

हायस्कूलचे चेअरमन लक्ष्मीकांत पार्सेकर, कमांडिंग ऑफिसर कॅप्टन एस. रामकुमार आणि ए.एन.ओ. लक्ष्मण लांबर यांच्या प्रमुख उपस्थितीत अवर लेडी ऑफ ग्रेस हायस्कूल डिचोलीचे माजी ए.एन.ओ. विद्याधर भगत यांच्या हस्ते तिला 1 गोवा नेव्हल युनिट एन.सी.सी कडून रोलिंग ट्रॉफी आणि ट्रॉफी देऊन गौरविण्यात आले.

या यशाबद्दल आयडियल हायस्कूलचे संस्थापक अध्यक्ष रामचंद्र गर्दे, मुख्याध्यापक ज्ञानेश्वर गावकर व शाळा व्यवस्थापनाने गौतमीचे अभिनंदन केले आहे.