National Games in Goa: यंदा गोव्यात 37 व्या राष्ट्रीय क्रीडा स्पर्धांचे आयोजन निश्र्चित असून शक्यतो ऑक्टोबर - नोव्हेंबर 2023 दरम्यान, आयोजित केल्या जातील. मात्र, तारखा येत्या दोन महिन्यात निश्‍चित होतील, असे केंद्रीय राज्य पर्यटन मंत्री श्रीपाद नाईक यांनी सांगितले.

काल नावेलीतील मनोहर पर्रीकर इनडोअर स्टेडियममध्ये तीन दिवसीय सहाव्या पेंच्याक सिलाट फेडरेशन कप या मार्शल आर्ट स्पर्धेचे उदघाटनप्रसंगी ते बोलत होते.

सध्या भारतीय ऑलिंपिक असोसिएशनच्या घटनेत थोडा बदल झाला असून दोन महिन्यात असोसिएशनची बैठक होऊन तारखा निश्‍चित होतील,असे ते म्हणाले.

यंदाच्या राष्ट्रीय क्रीडा स्पर्धेसाठी गोव्याची तयारी पूर्ण झाली असून आम्हाला थोडा वेळही मिळाला, हे चांगले झाले, असे गोवा ऑलिंपिक असोसिएशनचे अध्यक्षही असलेल्या मंत्री नाईक यांनी सांगितले. पेंच्याक सिलाट या क्रीडा प्रकाराचाही राष्ट्रीय क्रीडा स्पर्धेत समावेश करण्याचा आपण प्रयत्न करू, असे त्यांनी सांगितले.

उदघाटन सोहळ्यात गोवा पेंच्याक सिलाट असोसिएशनचे अध्यक्ष डॉ. शेखर साळकर यांनी स्वागत केले.

गोवा संघाची कर्णधार मारिया फुर्तादो हिने सर्व खेळाडूंना शपथ देवविली. भारतीय पेंच्याक सिलाट महासंघाचे अध्यक्ष किशोर प्रकाश येवले, संचालक मोहमद इक्बाल उपस्थित होते.सूत्रसंचालन श्रीकृष्ण नाईक यांनी केले. साझू पाल यांनी आभार मानले.

पेंच्याक सिलाट फेडरेशन कप स्पर्धेत 16 राज्यातील 800 पेक्षा जास्त खेळाडू सहभागी झाले असून ते सर्व 264 पदकांसाठी खेळतील.

गोवा संघही सहभागी झाला असून त्यांना या खेळातील देशातील सर्वोत्तम संघ असलेल्या जम्मू-काश्मीर, महाराष्ट्र, हरयाणा सारख्या राज्यातील खेळाडूंशी मुकाबला करावा लागेल.

जम्मू-काश्मीरच्या सर्वाधिक 60 हून अधिक खेळाडूंचा समावेश असून ही स्पर्धा ज्युनियर मुली व मुलगे तसेच सिनियर महिला व पुरूष गटांमध्ये होईल.