मडगाव: संपूर्ण राज्याला हादरवून सोडलेल्या मुंगूल गँगवॉर प्रकरणातील सर्व २८ ही संशयित आता जामीनमुक्त झाले आहेत.

रसूल शेख, मोहम्मद ताहीर खान, विल्सन कार्व्हालो, मलिक शेख, मंदार प्रभू, सूरज बोरकर, ओमप्रकाश मेघवाल, प्रकाश करबार, सूरज माझी, शाहरुख शेख, इम्रान बेपारी या अकरा जणांना दक्षिण गोवा जिल्हा सत्र न्यायालयाचे न्यायाधीश राम प्रभुदेसाई यांनी सोमवारी सशर्त जामीन मंजूर केला. 

त्‍यांना प्रत्येकी ५० हजारांचा बॉण्‍ड व तेवढ्याच रकमेचे दोन स्थानिक हमीदार, न्यायालयाच्या पूर्वपरवानगीशिवाय राज्याबाहेर न जाणे व अन्य अटी घालण्‍यात आल्‍या आहेत. मुंगूल येथे १२ ऑगस्ट रोजी ही गँगवॉरची घटना घडली होती. व्हॅली डिकॉस्टा व वॉल्टर यांच्या गँगच्या संघर्षातून टोळीयुद्ध भडकले होते.

त्‍यात युवकेश सिंग व रफिक तैशान हे दोघे गंभीर जखमी झाले होते. कुख्यात गँगस्टर लॉरेन्स बिश्‍‍नोई याचा या प्रकरणात सहभाग असल्याचे तपासात आढळून आल्याने गूढ वाढले होते. दरम्‍यान, या टोळीयुद्ध प्रकरणात व्हॅली डिकॉस्टा, अमोघ नाईक, अमर कुलाल, वासू कुमार, मोहन अली, ज्योयस्टन फर्नांडिस, सुनील बिलावर, बाशा शेख, गौरांग कोरगावकर, राजेश वेल्मा, प्रकाश वेल्मा,

अविनाश गुंजीकर, धनंजय तलवार, अक्षय तलवार, महेश नाईक, दीपक कट्टीमणी व परशुराम राठोड यांना यापूर्वीच जामीन मंजूर झाला आहे. फातोर्डा पोलिसांनी संशयितांवर तब्बल ६२४ पानाचे आरोपपत्र दाखल केले असून, एकूण ८० साक्षीदारांची यादी जोडली आहे.