Goa-Mumbai Private Bus Accident at Kolhapur: गोव्याहून मुंबईला जाणाऱ्या खासगी बसचा कोल्हापुरात भीषण अपघात झाला आहे. यात एकाच कुटूंबातील तिघांचा मृत्यू झाला आहे. तिघेही मृत पुण्याचे आहेत. कोल्हापुरातील पुईखडी येथे रात्री सव्वा दोनच्या सुमारास हा अपघात झाला.

बसमध्ये एकूण 25 प्रवासी होते. 16 प्रवासी सुखरूप असल्याचे सांगितले जात आहे. तर जखमींना तात्काळ रुग्णालयात दाखल करण्यात आले

व्ही.आर.एल. कंपनीची ही खासगी स्लीपर बस आहे. रात्री सव्वा दोनच्या सुमारास पुईखडी येथील वळणावर बस चालकाचे बसवरील नियंत्रण सुटल्याने बस पलटी झाली.

रात्र असल्याने सर्व प्रवासी झोपेत होते. गाडी पलटी झाल्याने मोठा आवाज झाला. त्यामुळे प्रवाशांचा आरडाओरडा सुरू झाला.

अपघातात तीन प्रवाशांचा जागीच मृत्यू झाला. नीलू गौतम (वय 43), रिधिमा गौतम (वय 17), सार्थक गौतम (वय 13) अशी मृतांची नावे आहेत. हे सर्वजण पुण्याचे रहिवाशी आहेत. चार प्रवासी बसखाली अडकले होते.

रात्री उशिरापर्यंत त्यांना बाहेर काढले गेले. जखमींवर रूग्णालयात उपचार सुरू आहेत. क्रेनच्या सहाय्याने ही बस पुन्हा रस्त्यावर उभी केली गेली.

दरम्यान, काही दिवसांपुर्वीच शाहुवाडी येथे गोव्याहून पुण्याकडे जाणारी एक खासगी बस नदीपात्रात पडली होती.