Goa-Moscow Flight या पर्यटन हंगामातील पहिले रशियन चार्टर विमान मॉस्कोहून गोव्यात आज (रविवारी) पहाटे ५.३० वाजता दाबोळी विमानतळावर २५५ पर्यटकांना घेऊन उतरले. महिन्याभरात अाणखी २५ चार्टर विमाने दाखल होतील, अशीही माहिती मिळाली आहे.

सागरी पर्यटन हंगामाला २२ सप्टेंबरला सुरवात झाल्यानंतर २०२३-२४ या हंगामातील पहिले रशियन चार्टर विमान आज दाखल झाले. पर्यटकांनी दाबोळी विमानतळावर पाय ठेवताच पर्यटन खात्यातर्फे त्यांचे गुलाब पुष्प देऊन स्वागत केले.

रशिया सरकारच्या ‘एरोफ्लॉट’ या विमान कंपनीने शनिवारपासून मॉस्को आणि एकटेरिनबर्ग येथून गोव्यासाठी थेट उड्डाण सुरू करण्याची घोषणा केली आहे. ही सेवा दाबोळी आंतरराष्ट्रीय विमानतळावर चालविली जाईल, असे ''एरोफ्लॉट''ने म्हटले आहे.

रशिया-युक्रेन युद्धाचा परिणाम

रशिया-युक्रेन युद्धामुळे रशियाची आर्थिक स्थिती दिवसेंदिवस कमकुवत होत चालली आहे. त्यामुळे गोव्याच्या पर्यटनावरही त्याचा परिणाम झाला आहे. रशियन पर्यटक मोठ्या प्रमाणात खर्च करतात.

त्याचा लाभ किनारी भागातील व्यावसायिकांना होत होता. पण आता ती स्थिती राहिलेली नाही. किनारी भागातील हॉटेल्स, रेस्टॉरंट्स, गेस्ट हाऊसवर नजर टाकली तर देशी पर्यटकांची संख्याच मोठ्या प्रमाणात दिसून येते.

मॉस्कोहून दिल्लीलाही उड्डाण

गोव्याव्यतिरिक्त रशियातून मॉस्को ते दिल्ली थेट उड्डाणे देखील सुरू करण्यात येणार आहेत. भारत आणि रशिया यांच्यातील द्विपक्षीय करारानुसार, ३० सप्टेंबरपासून शेरेमेत्येवो विमानतळावरून तीन साप्ताहिक उड्डाणे मंगळवार, शुक्रवार आणि शनिवारी वाईड-बॉडी एअरबस ए-३३० चालवली जातील. एरोफ्लोट एसयू२३६ फ्लाईट सुमारे २५५ प्रवाशांसह आज पहाटे दाबोळी विमानतळावर पोहोचले.

वेडिंग डेस्टिनेशन’ पुरस्कार

दिल्ली येथील एका हॉटेलमध्ये पर्यटनावर आधारित ‘बीएलटीएम’ हा कार्यक्रम नुकताच पार पडला. या कार्यक्रमात गोवा पर्यटन विभागाला ‘मोस्ट एक्सक्ल्यूझिव्ह वेडिंग डेस्टिनेशन’ या पुरस्काराने गौरवण्यात आले.

फेअर फेस्ट मीडियाचे चेअरमन आणि मुख्य कार्यकारी अधिकारी संजीव अग्रवाल यांच्या हस्ते हा पुरस्कार देण्यात आला.

गोवा पर्यटन विकास महामंडळाचे जनरल मॅनेजर मार्केटिंग गेविन डायस आणि इतर उपस्थित होते.