Morjim : एका दिव्यांग व्यक्तीने पेडणे शहरातील मुख्य रस्त्यावर अर्ध्या तासापेक्षा जास्त वेळ ठाण मांडून वाहतुकीला अडथळा निर्माण केला. नागरिकांनी जाब विचारल्यावर त्याने उडवाउडवीची उत्तरे दिली. परंतु पिंक फोर्सच्या महिला पोलिसांनी त्याच्याशी संवाद साधून तेथून हटवले.

शुक्रवारी एक दिव्यांग व्यक्ती पेडणे शहरात भर रस्त्यावर मधोमध ठाण मांडून वाहतुकीला अडथळा करत होती. अशा स्थितीत काही नागरिकांनी त्याच्याकडे विचारणा केली असता, त्याने असंबद्ध उत्तरे दिली.

त्यानंतर प्रस्तुत प्रतिनिधीने पेडणे पोलिसांशी संपर्क साधून या व्यक्तीची माहिती पोलिसांना दिली. त्यावेळी पिंक फोर्सच्या महिला पोलिस कॉन्स्टेबल श्रुती च्यारी आणि त्यांच्या सहकारी दिशा या घटनास्थळी पोचल्या. त्यांनी त्याला रस्त्याच्या कडेला नेऊन संवाद साधला. त्यावेळीही त्या व्यक्तीने सुरुवातीला उडवाउडवीची उत्तरे दिली.

वाहनासाठी अडविला रस्ता

महिला पोलिस श्रुती च्यारी त्याला म्हणाल्या की, पोलिस सदैव लोकांच्या मदतीसाठी तत्पर असतात. मग तुम्ही पोलिस स्टेशनवर का आला नाहीत. त्यावर त्याने उत्तर देणे टाळले. मी केरळ येथून आलो असून मला रेल्वे स्टेशनवर जाण्यासाठी रिक्षा मिळत नाही किंवा बसही थांबत नाही, म्हणून रस्त्याच्या मधोमध थांबल्याचे त्याने सांगितले. शेवटी महिला पोलिसांनी त्याला पोलिस स्टेशनवर नेऊन या विषयावर पडदा टाकला.