राज्यभरात मुसळधार पावसाने थैमान घातले असून, जागोजागी पडझड होण्याच्या घटनांमध्ये वाढ झाली आहे. प्रामुख्याने ग्रामीण भागात पडझडीच्या घटनांचे प्रमाण जास्त असते, मात्र सध्या शहरी भागातही झाडे कोसळण्याचे प्रमाण वाढले आहे. पणजीतील जिमखान्याजवळील मुख्य रस्त्यावर झाड कोसळल्याने वाहतुकीला अडथळा निर्माण झाला होता.

भाऊसाहेब बांदोडकर मार्गावरील पणजी जिमखान्यासमोरील भला मोठा जुना वृक्ष मध्यरात्री मुख्य रस्त्यावर कोसळला. अग्निशामक दलाने रस्त्यावरील झाडाच्या फांद्या कापून वाहतूक खुली केली.

झाडाचा उर्वरित भाग महानगरपालिका कर्मचाऱ्यांनी सकाळपासून हटविण्यास सुरुवात केली आहे. सुदैवाने यावेळी रस्त्यावर वाहतूक तुरळक असल्याने यामध्ये कोणतीही जीवितहानी झाली नाही.

दरम्यान, राज्यात सुरू असलेल्या मुसळधार पावसामुळे पारोडा केपे येथील पूल पाण्याखाली गेला आहे. यामुळे मडगाव - केपे मार्गावरील वाहतुकीवर परिणाम झाला आहे. सुरक्षेच्या दृष्टीकोनातून हा मार्ग वाहतुकीसाठी आणि नागरिकांसाठी बंद करण्यात आला आहे.