Goa Monsoon 2023: गेल्या काही आठवड्यात राज्याच्या पावसाने उघडीप दिल्यानंतर मागील काही दिवसांपासून पावसाच्या सरी बरसू लागल्या होत्या.

त्यातच आता गोवा वेधशाळेने पाऊस सक्रिय होण्याची चिन्हे दर्शवत पुढील काही दिवस गोव्यासह लगतच्या कोकणासाठी 'यलो अलर्ट' जारी केला.

16 आणि 17 सप्टेंबर रोजी मुसळधार ते अतिमुसळधार पाऊस बरसण्याचा अंदाज वर्तवण्यात आला आहे.

बंगालच्या उपसागरात कमी दाबाचा पट्टा आणि चक्रीय वारे निर्माण झाल्याने 15 सप्टेंबरपासून पुढील चार दिवस राज्यात जोरदार पावसाची शक्यता हवामान खात्याद्वारे वर्तविली असून यलो अलर्ट जारी केला आहे.

अरबी समुद्रात ताशी 55 ते 75 किलोमीटर प्रतितास वेगाने वारे घोंघावणार असल्याने मच्छीमारांनी समुद्रात प्रवेश करू नये, असे आवाहन केले आहे. मागील 24 तासांत राज्यात 5 मि.मी. पाऊस पडला.

राज्यात आतापर्यंत एकूण 2,872 मि.मी. पाऊस पडला असून सरासरी पावसाच्या तुलनेत 0.7 टक्के अधिक पाऊस पडला आहे. गुरुवारी पणजी येथे कमाल 31.5, तर किमान 24.0 अंश सेल्सिअस तापमानाची नोंद झाली.

गोव्यात गणेश चतुर्थीच्या तयारीला वेग आला असून रंगरंगोटीच्या सामानासह फुले, फळे, भाजीपाला यांच्या बाजारपेठांत नागरिकांनी गर्दी करायला सुरुवात केलीय.

मात्र वेधशाळेने वर्तवलेल्या अंदाजावरून यंदा बाजारावर पावसाचे सावट राहण्याची चिन्हे दिसत आहेत. गेल्या काही दिवसांपासून राज्यात ढगाळ हवामान अनुभवायला मिळत आहे.

दरम्यान गोव्यात माटोळीचा बाजाराला सुरुवात झाली असून नारळ, केळी, पपई, सफरचंद, सुपारीची पेंड या सामानासह अन्य पूजेचे साहित्य खरेदी करण्यास लोकांची गर्दी बाजारात दिसू लागली आहे. मात्र सणासुदीच्या काळात बरसणाऱ्या या पावसामुळे लोकांच्या उत्साहावर पाणी फिरण्याची शक्यता आहे.