Goa Monsoon 2023 राज्याला मागील काही दिवसांपासून पावसाने अक्षरशः झोडपून काढले असून मुसळधार पडणाऱ्या पावसामुळे येथील जनजीवन विस्कळीत झाले आहे. मागील दोन दिवसात पावसाचा जोर काही प्रमाणात कमी झाला असला तरी पडझडीच्या घटना मात्र सुरूच आहेत.

मुसळधार पावसामुळे काल म्हणजेच शनिवारी चार ठिकाणी झाड कोसळल्याच्या घटना घडल्या असून आज रविवारी देखील झाडे उन्मळून पडण्याच्या घटना घडल्या आहेत.

मांद्रे सावंतवाडा येथे 400 वर्ष जुने पिंपळाचे झाड एका घरावर कोसळले असल्याचे वृत्त हाती येतेय. या घटनेत घराचे बऱ्याच प्रमाणात नुकसान झाले असले तरी यात सुदैवाने कोणतीही जीवितहानी झाली नसल्याचे सांगण्यात येत आहे.

दरम्यान शुक्रवारी संध्याकाळी हरवळे गावात अवघ्या पाच मिनिटांत सर्वत्र जोरदार वाऱ्यामुळे झाडे कोसळली. या झाडांबरोबरच वीजखांब आणि विद्युत वाहिन्याही रस्त्यावर तुटून पडल्याची घटना घडली होती.

मॉन्सून वारे वेगाने वाहत असल्याने राज्यभर मोठ्या प्रमाणात पडझड सुरू आहे. झाडे कोसळल्यामुळे अनेक भागांत विजेचाही खेळखंडोबा झाला आहे. सत्तरी, पेडणे, तसेच राज्यातील काही भागांत विजेचा लपंडाव सुरूच आहे.

मुसळधार पाऊस आणि वादळी वाऱ्यामुळे पडझडीच्या घटनांत वाढ झाली आहे. मुरगाव, काणकोण, फोंडा, तिसवाडी आणि सासष्टी या तालुक्यात सर्वाधिक नुकसान झाल्याची माहिती समोर आली आहे.

राज्यात गेल्या 15 दिवसांपासून सुरू असलेल्या पावसामुळे घरे, वीजखांब, ट्रान्सफॉर्मर, वाहने, दरड कोसळणे, रस्ता खचणे, अशा विविध घटनांमुळे जनजीवन विस्कळीत झाले आहे.