Chapoli Dam काणकोण तालुक्याची तहान भागविणारा चापोली धरण जलाशय पूर्ण क्षमतेने भरून आज सकाळी वाहू लागला.गेले अनेक दिवस धरण जलाशय पूर्ण क्षमतेने भरण्याची प्रतिक्षा होती.सद्या धरण जलाशयात ३८.७५ आर.एल. पाणीसाठा आहे.गेल्यावर्षी १९ जुलैला जलाशय पूर्ण क्षमतेने भरून वाहू लागला होता. गेल्यावर्षापेक्षा यंदा आठ दिवस उशिरा जलाशय पूर्ण क्षमतेने भरला आहे.

पाऊस जास्त पण...

यंदा गेल्या वर्षीच्या मानाने १२ इंच पाऊस जास्त झाला आहे, मात्र धरण जलाशय पूर्ण क्षमतेने वाहू लागला नाही.त्यावेळी धरण जलाशयात ११२२.३१ हेक्टोमीटर जलसाठा तयार झाला होता आतापर्यंत जलाशयात १०८३.२१ हेक्टोमीटर जलसाठा आहे. गेल्या वर्षीच्या मानाने जास्त पाऊस होऊनही ३९.१० हेक्टोमीटर पाणी साठा कमी आहे.

• 24 तासात काणकोणात १.७२ इंच पावसाची नोंद

• आतापर्यंत काणकोणात ९२.७५ इंच पाऊसाची नोंद

शेतजमिनीत पाणी तुंबल्याने नुकसान, सासष्टीतील प्रकार

सतत कोसळत असलेल्या पावसामुळे सासष्टीतील अनेक भागातील भातशेती नष्ट झाली आहे यात कुडतरी, नुवे, वेर्णा, राय, चिंचिणी सह इतर भागातील शेती रोपण साचलेल्या पाण्यामुळे धोक्यात आली आहे असे येथील शेतकऱ्यांनी सांगितले आहे.

शेती रोपण व्यवसायाला राज्य सरकार चालना देत असले तरी मागील दोन वर्षांपासून कोणतीही सबसिडी आम्हाला मिळाली नसल्याचेही अनेक शेतकऱ्यांनी सांगितले. शेतीत भात रोपांची लावण करून फायदा काय, असा प्रश्नही त्यांनी उपस्थित केला आहे.

प्राथमिक अहवालानुसार संपूर्ण तालुक्यात सुमारे १,५०० हेक्टर भातशेतीचे क्षेत्र पुराच्या पाण्यात बुडाले आहे. मडगाव विभागीय कृषी अधिकारी शेरीफ फुर्तादो यांच्या नेतृत्वाखाली त्यांचे सहकारी शेताची पाहणी करत आहेत आणि पावसामुळे झालेल्या नुकसानीचे मूल्यांकन करत आहेत.

चिंचणी येथील कोसेसाव व निकलाव दोघा शेतकऱ्यांनी सांगितले,की आमचा शेती व्यवसाय हा पिढ्यानपिढ्या चालत आलेला आहे. या शेतीतून आम्हला फायदा होवो किंवा नुकसान मात्र आम्ही ही पारंपरिकता जपणार आहोत. या कामात आमची मुलंही आपला काम धंदा सोडून या शेतीत सहकार्य करीत आहेत व सरकरने याची दाखल घेऊन आम्हाला सहकार्य करायला हवे.