Mission Rabies Signs MoU with BMC: मुंबई शंभर टक्के रेबीजमुक्त होण्यासाठी आता यशस्वी गोवा मॉडेलचा स्वीकार करणार आहे. याबाबत 'मिशन रेबीज'ने बृहन्मुंबई महानगरपालिका (BMC) सोबत एक सामंजस्य करार केला आहे. कराराच्या माध्यमातून मुंबईत 100 टक्के रेबीज-मुक्त गोवा मॉडेल राबविण्यासाठी कौशल्य आणि तांत्रिक सहाय्य प्रदान केले जाणार आहे.

टाईम्स ऑफ इंडियाने प्रसिद्ध केलेल्या वृत्तानुसार, मुंबईत पुढच्या वर्षी फेब्रुवारीमध्ये 10 दिवसांत 75,000 भटक्या कुत्र्यांचे लसीकरण करण्यात येणार आहे.

यासाठी, 50 स्वयंसेवकांची एक टीम भटक्या श्वानांचा शोध घेणे आणि पकडून लसीकरण करण्यासाठी मुंबईच्या रस्त्यावर फिरणार आहे.

गोवा मिशन रेबीजचे शिक्षण संचालक डॉ. मुरुगन अप्पुपिल्लई लसीकरण मोहिमेच्या सूक्ष्म तयारीवर प्रकाश टाकला.

भटक्या कुत्र्यांची संख्या नोंद करण्यासाठी आमच्याकडे एक अॅप आहे आणि आमचे अधिकारी गेल्या तीन महिन्यांपासून मुंबईत तैनात आहेत अशी त्यांनी इंग्रजी वृत्तापत्राला माहिती दिली.

मिशन रेबीज आणि बीएमसी यांच्यातील सहकार्य मिशन रेबीज आणि गोवा सरकारच्या समान धर्तीवर चालणार आहे.

'गोवा देशातील पहिले 'रेबीज नियंत्रित राज्य' आहे. राज्यात मानवात रेबीज संक्रमण रोखण्यात आले आहे. 2018 पासून गोव्यात एकही रेबीज संक्रमित व्यक्ती आढळून आलेला नाही.

दरम्यान, गोवा मॉडेल आता मुंबईत राबवले जाणार आहे. या अंतर्गत भटक्या श्वानांचे लसीकरण हे प्राथमिक धेय्य असेल, त्यानंतर यात पाळीव श्वानांचा देखील समावेश केला जाणार आहे.