Goa Mine मुळगाव, मये, शिरगाव, लामगाव, बोर्डा आणि डिचोली या सहा क्षेत्रांवरील इम्पॅक्ट असेसमेंट अहवाल स्पष्ट न केल्याने खाणग्रस्त भागातील शेतकऱ्यांनी राज्य सरकारच्या हेतूवर प्रश्नचिन्ह उपस्थित केले आहे. भविष्यात खाणकाम सुरू होण्याची शक्यता असलेल्या लीजवरील भागात दर्शविलेली निवासी घरे, मंदिरे यांचे भवितव्य काय, असा सवाल शेतकऱ्यांनी उपस्थित केला.

बुधवारी (ता.९) मये, डिचोली, मुळगाव, शिरगाव आणि लामगाव या खाणग्रस्त भागातील शेतकऱ्यांच्या गटाने आझाद मैदान पणजी येथे या भागातील खाण उपक्रम घाईघाईने सुरू करण्यामागच्या विषयावर माध्यमांशी संवाद साधला.

पत्रकारांशी बोलताना सामाजिक कार्यकर्ते आणि मुळगावचे रहिवासी स्वप्नेश शेर्लेकर यांनी गोव्यातील ४० ग्रामपंचायतींमध्ये ठेवण्यात आलेल्या इम्पॅक्ट असेसमेंट अहवालावरील जनसुनावणी सरकारने घाईघाईने हाती घेतल्याबद्दल प्रश्नचिन्ह उपस्थित केले.

मुळगाव, मये, शिरगाव, लामगाव, बोर्डा आणि डिचोली या सहा भागांतील गावकऱ्यांना ६०० पानांचा तांत्रिक अहवाल सोपा करून समजावून सांगण्यासाठी राज्य सरकारने कोणतेही प्रयत्न केले नाहीत, याकडे त्यांनी लक्ष वेधले.

खाण लीज 50 वर्षांसाठी आहे आणि ज्या खासगी कंपनीला लीज मिळाले आहे ते खाणकाम करतील; पण त्या लीज क्षेत्रात 100 पेक्षा जास्त घरे आणि काही मंदिरे दाखवली आहेत. या घरांचे आणि मंदिरांचे भवितव्य काय असेल, हे सरकारने आम्हाला समजावून सांगण्याची गरज आहे.

- स्वप्नेश शेर्लेकर, सामाजिक कार्यकर्ते