Goa Mine: मायनिंगमुळे अर्थप्राप्ती होत असली तरी त्याचे दुष्परिणाम खाण क्षेत्रालगतच्या ग्रामस्थांना सहन करावे लागत असल्याच्या घटना निदर्शनास येत आहेत. खनिज खाणीमुळे मुळगाव येथील तळे संकटात आले असून तळ्याची मंगळवारी गोवा प्रदूषण नियंत्रण मंडळाकडून पाहणी करण्यात आली.

प्रदूषण नियंत्रण मंडळाकडून या तळ्यातील पाण्याचे नमुनेही तपासणीसाठी गोळा करण्यात आले आहेत. गेल्या 25 फेब्रुवारी रोजी झालेल्या पंचायतीच्या ग्रामसभेत तळ्याचा विषय चर्चेत आला होता.

खाणपीठातील पाणी आणि खाणीवरील गाळ तळ्यात सोडण्यात येत असल्याने तळ्याचे अस्तित्व धोक्यात आल्याची भीती ग्रामस्थांनी ग्रामसभेत व्यक्त केली होती.

गावचे वैभव असलेल्या तळ्याचे अस्तित्व टिकून राहावे, अशी मागणी करतानाच प्रदूषण नियंत्रण मंडळाकडून या तळ्याची पाहणी करावी, असा ठराव ग्रामसभेत घेण्यात आला होता. त्यासाठी 12 मार्च हा दिवसही निश्चित करण्यात आला होता.

ग्रामसभेत ठरल्यानुसार प्रदूषण नियंत्रण मंडळाकडून मुळगाव येथील नैसर्गिक तळ्याची पाहणी करण्यात आली.

प्रदूषण नियंत्रण मंडळाचे कनिष्ठ अभियंता प्रथमेश देसाई आणि साहाय्यक अनिल परब यांच्या उपस्थितीत झालेल्या या पाहणीवेळी मुळगावच्या सरपंच तृप्ती गाड, उपसरपंच गजानन मांद्रेकर, अन्य पंचसदस्य, देवस्थान समितीचे अध्यक्ष वसंत गाड, शेतकरी संघटनेचे प्रकाश परब, कोमुनिदाद संस्थेचे रामकृष्ण परब, माजी सरपंच गोविंद मांद्रेकर, समाजकार्यकर्ते स्वप्नेश शेर्लेकर यांच्यासह विविध ग्रामसंस्थांचे प्रतिनिधी आणि ग्रामस्थ उपस्थित होते.