सासष्टी: यांत्रिकी मासेमारी बोटींकडून किनारी मच्छिमारी नियमांचे उल्लंघन होत असल्याचे पारंपरिक मच्छिमारांकडून सांगण्यात येत आहे. एरव्ही यांत्रिकी बोटींना समुद्र किनाऱ्यापासून २०० मीटर आत येण्यास मनाई आहे. तरीसुद्धा या बोटी आत येऊन मासेमारी करतात. त्यामुळे आमच्यावर उपासमारीची पाळी येईल, अशी भीती पारंपरिक मच्छीमार व्यक्त करू लागले आहेत.

नियमांचे उल्लंघन होत असतानाही मत्स्य व्यवसाय संचालनालयाकडून कोणतीही कारवाई केली जात नसल्याचेही त्यांनी स्पष्ट केले आहे.

यांत्रिकी बोटींना एलईडी लाईटही लावली आहे, अशी माहिती मच्छीमार जुझे फर्नांडिस यांनी दिली. ही स्थिती अशीच राहिली तर मासेमारी करण्यासाठी लहान बोटी समुद्रात नेणे कठीण होईल.

शिवाय आमच्या जाळ्याला मासेसुद्धा जास्त लागणार नाहीत, असे एलिस्टन पिंटो यांनी सांगितले. मत्स्य व्यवसाय खात्याने याची दखल घेऊन कारवाई करण्याची मागणी दुमिंग रॉड्रिग्स यांनी केली आहे.