मडगाव: आर्थिक डबघाईला आल्याने आरबीआयकडून (RBI) बंदी लादलेल्या मडगाव अर्बन सहकारी बँकेने (Urban Cooperative Bank) आजपासून ठेवीदारांच्या बँकेत अडकलेल्या ठेवी परत करण्याच्या प्रक्रियेला सुरवात केली आहे. ठेवीदारांनी आपल्या परताव्याचे दावे दोन महिन्यात सादर करावेत असे बँकेने (Bank) म्हटले आहे. सध्या या बँकेत लोकांचे सुमारे 190 कोटी रुपये अडकले असून बँकेकडे फक्त 122 कोटी रोख रक्कम उपलब्द आहे. 5 लाख रुपयांपर्यंतच्या ठेवी खातेदारांना सुरवातीला मिळण्याची शक्यता आहे.

या बँकेवर सरकारने नियुक्त केलेले लिक्विडेटर एस. व्ही नाईक यांनी आज नोटीस जारी केली आहे. ठेवीदारांनी आपल्या ठेवींच्या पावत्या किंवा खात्याचे पासबुक आपल्या दाव्यासोबत सादर कराव्यात असे या नोटीसीत म्हटले आहे. दरम्यान बँकेतील लॉकरमध्ये ज्यांनी आपल्या वस्तू ठेवल्या आहेत त्या 30 सप्टेंबर पर्यत लोकांनी घेऊन जाव्यात असेही या नोटीसीत म्हटले आहे.

मडगाव अर्बन ही गोव्यातील काही प्रमुख सहकारी बँकापैकी एक मानली जायची मात्र खनिज व्यावसायिकांना कर्ज देताना विशेष खबरदारी न घेतल्याने ही कर्जे बुडून ही बँक नुकसानीत गेली होती. त्यामुळेच आरबीआयने तिच्यावर बंदीची टाच आणली होती.