Margao News मडगाव मधील एसजीपीडीए मार्केटमधील 5 टीडीपी बायोमिथेनेशन प्लांट बंद केलेला नाही,असा निर्वाळा आमदार दिगंबर कामत यांनी दिला. यावेळी नगराध्यक्ष दामोदर शिरोडकर यांच्यासह मुख्याधिकारी गौरीश शंखवाळकर उपस्थित होते.

या प्लांटमध्ये कणयुक्त द्रव साचलेला आहे तो काढण्यासाठी व देखभाल व दुरुस्तीसाठी बंद ठेवण्यात आलेला आहे. देखभाल झाल्यावर तो पूर्ववत सुरु केला जाईल, असे कामत यांनी सांगितले.

मुख्याधिकारी शंखवाळकर यांच्या म्हणण्याप्रमाणे साचलेला कणयुक्त द्रव काढण्यासाठी सार्वजनिक बांधकाम खाते, सिवरेज खाते व वास्को कचरा प्रक्रिया प्रकल्प यांच्याकडे संपर्क साधण्यात आलेला आहे. मात्र ते कसे प्रतिसाद देतात ते पहावे लागेल.

दरम्यान, सोनसोडो कचरा संदर्भात उच्च न्यायालयाची पुढील सुनावणी 11 सप्टेंबरला आहे. कदाचित त्यावेळी नगरपालिका एसजीपीडीए मार्केटमधील 5 टीडीपी बायोमिथेनेशनचा प्लांट संदर्भात न्यायालयाचे लक्ष वेधणार आहे, असे कळते.

रावणफोंड रेल्वे उड्डाणपुलाच्या संदर्भात बोलताना कामत यांनी सांगितले की, या प्रकल्पाचे काम बंद नाही. कंत्राटदार कामाची व लागणाऱ्या साहित्याची जमवाजमव करीत आहे.

पार्किंग इमारतीत रेस्टॉरंट असल्यास गैर काय ?

नगरपालिका इमारतीमागील पार्किंग प्लाझा इमारतीचे बांधकाम लवकरच सुरू केले जाणार असून हे बांधकाम ‘जीसुडा’ मार्फत करण्यात येणार आहे.

या पार्किंग इमारतीत रेस्टॉरंट साठी जागा ठेवणे यात गैर काय आहे असा प्रश्र्न करुन आमदार दिगंबर कामत यांनी सांगितले की, रेस्टॉरंटची गरज आहे व त्यातून नगरपालिकेला महसूल प्राप्त होईल.

नगरपालिका इमारतीचे नूतनीकरण, सौंदर्यीकरणाचे काम लवकरच सुरु करण्यात येईल. हे सुद्धा काम जीएसआयडीसी मार्फत केले जाईल, असेही त्यांनी सांगितले.