Goa Disaster Management वादळ, भूकंप आणि अन्य आपत्तीच्या वेळी लोकांना राहायला सहारा मिळावा यासाठी केंद्र सरकारच्या योजनेतून मडगाव शहराला आपत्ती निवारा केंद्र मंजूर झाले असले तरी मागची सहा वर्षे या केंद्राचे बांधकाम रखडले आहे.

आके येथील बाल भवनाजवळ बांधण्यात येत असलेल्या आपत्ती निवारा प्रकल्पाचे काम अंतिम टप्प्यात असले तरी ते रखडले आहे. या ठिकाणी कोणती अडचण निर्माण झाली आहे याची चौकशी केली असता येत्या काही दिवसांत आपण हे काम पूर्ण करून घेणार, असे स्थनिक आमदार दिगंबर कामत यांनी सांगितले.

मडगाव व सभोवतीच्या परिसरात पावसाळ्यात पूर येण्याचे प्रकार सर्रास घडत आहेत. सात वर्षांपूर्वी खारेबांद या ठिकाणी पावसाळ्यात अनेक घरांत पाणी शिरले होते. त्यामुळे येथील स्थानिकांना फातोर्डा येथील स्टेडियममध्ये स्थलांतरित करण्यात आले होते.

अशी परिस्थिती अधूनमधून उद्भवत असल्याने येथील नागरिकांच्या सुरक्षेसाठी आके येथील बाल भवनासमोर आपत्कालीन निवारा प्रकल्पाचे काम सुरू आहे. त्यामुळे आपद्‍ग्रस्तांना या प्रकल्पात सुरक्षित ठेवण्याची सोय होणार आहे.

हा प्रकल्प तातडीने पूर्ण करावा, अशी मागणी मडगाववासीयांनी केली होती. आता तो पूर्ण होण्याच्या वाटेवर असला तरी या प्रकल्पाचे काम रेंगाळत आहे.

प्रकल्प पूर्णत्वाच्या मार्गावर...

मानवनिर्मित आपत्ती ही कोणत्याही प्रकारची असू शकते. ज्यात युद्ध , इमारत कोसळणे, दंगल, दहशतवादी हल्ला, औद्योगिक धोका, चेंगराचेंगरी अशावेळी या प्रकल्पाचा स्थनिकांना लाभ होणार आहे. आमदार दिगंबर कामत यांनी सांगितले की, कोरोनाच्या काळात येथील प्रकल्पाचे काम संथगतीने सुरू होते आता हा प्रकल्प पूर्णत्वाच्या मार्गावर आहे.