Margao Bus Stand मडगाव येथील कदंब बस स्थानक परत एकदा चर्चेत आले आहे. हा बसस्थानक सध्या खड्ड्यांत हरवला आहे. पावसाळ्यात पाणी तुंबून असल्याने खड्डे दिसत नव्हते, आता पावसाळा ओसरल्याने भलेमोठे खड्डे नजरेस पडू लागले आहेत.

खड्ड्यांमुळे बसगाड्या हेलकावे खात पुढे जात असल्याचे दिसते. प्रवाशांना तर फेरीबोट किंवा एखाद्या होडीत बसल्यासारखे वाटते.

या बसस्थानकाचे नूतनीकरण करण्याचा प्रस्ताव असल्याचे आमदार दिगंबर कामत यांनी यापूर्वी जाहीर केले आहे, मात्र अजून काहीही हालचाल झालेली दिसत नाही. मास्टर प्लॅन अंतर्गत या बसस्थानकाचे काम केले जाण्याची शक्यता आहे.

66 लाख खर्चाचे अंदाजपत्रक

मडगाव बस स्थानकाच्या दुरवस्थेकडे लक्ष वेधले तेव्हा डेपो व्यवस्थापकाने सांगितले की, बस स्थानकावरील रस्ते सुधारण्यासाठी 66 लाख रुपयाचे अंदाजपत्रक तयार केले आहे.

मात्र अजून या अंदाजपत्रक मंजुरी मिळालेली नाही. महामंडळाला येथील स्थितीची पूर्ण जाणीव असल्याचेही त्याने सांगितले.

अल्ट्रा मॉडर्न बसस्टॅण्ड...

2011 साली मुख्यमंत्री असताना दिगंबर कामत यांनी अल्ट्रा मॉडर्न बसस्टॅण्डची पायाभरणी केली होती. पण 12 वर्षे लोटली तरी हा प्रकल्प पुढे गेला नाही.