रेवोडा येथील चिरेखाणीजवळ पिकनिकसाठी मडगावहून काही युवकांचा गट आला असता, यातील २१ वर्षीय युवकाचा बुडून मृत्यू झाला. ही दुर्घटना रविवारी (ता.१३) सकाळी साडेदहाच्या सुमारास घडली. राज लोटलीकर (रा. मडगाव) असे मृत युवकाचे नाव आहे.

दरम्यान, नानोडा येथीलही एक युवक आज बुडाला. सहा ते सात जणांचा युवकांचा गट मडगावहून रेवोडा येथे चिरेखाणस्थळी पिकनिकसाठी आला होता. हे युवक पाण्याने भरलेल्या चिरेखाणीत उतरला असता, त्यातील राज लोटलीकर हा युवक पाण्यात बुडाला. यावेळी मित्रांनी त्याचा शोध घेण्याचा प्रयत्न केला. मात्र, तो सापडला नाही.

कोलवाळ पोलिस व म्हापसा अग्निशमन दलाने घटनास्थळी धाव घेऊन मृतदेह अथक प्रयत्नांनंतर अखेर बाहेर काढला. पोलिस या प्रकरणाचा तपास करत आहेत.

निर्जन स्थळी चिरेखाण

सातजणांचा हा गट मडगावहून पिकनिकसाठी आला होता. मुख्य रस्त्यावरून ही चिरेखाण दीड किलोमीटर आतमध्ये आहे. या खंदकाकडे जाण्यासाठी पुरेशी वाटही नाही. स्थानिकही तिथे जात नाहीत. हे सर्व मित्र चालत चिरेखाणीवर पोहोचले.

ही खाण पोहण्यासाठी असुरक्षित आहे. राजचा मृतदेह बाहेर काढण्यासाठी अग्निशमन दलाला प्रचंड मेहनत घ्यावी लागली. यावेळी खासगी जीवरक्षक बोलावले होते. ही दुर्घटना सकाळी १०.४० च्या सुमारास घडली. परंतु दुपारी २.२० वाजता मृतदेह पाण्याबाहेर काढला.

एकुलता एक पुत्र हरपला

राज लोटलीकर (वय २१ वर्षे) हा  प्रतिभा आणि राजन लोटलीकर यांचा एकुलता एक पुत्र या दुर्घटनेत हरपला. त्याला रिमा, रिचा, रिया या तीन बहिणी. त्यातील रिचा ही विवाहीत आहे. राजन लोटलीकर हे व्यावसायिक तथा नागेश गार्डन्सचे मालक आहेत. राज हा पदवीधर असून वडिलांच्या व्यवसायात मदत करत होता.

तो येथील एका जीमचा भागीदारही होता. मृतदेह उत्तरीय तपासणीनंतर कुटुंबीयांच्या स्वाधीन केला जाईल. त्याच्यावर १७ ऑगस्ट रोजी अंत्यसंस्कार करण्यात येतील, असे कुटुंबीयांकडून सांगण्यात आले.

चिरेखाण मालकावर कारवाईची मागणी

साळ : भटवाडी-नानोडा येथील संतोष शेळके (वय १९) हा युवक आज (रविवारी) भटवाडी येथील एका बंद चिरेखाणीवर पोहायला गेला असता बुडाला. सायंकाळी उशिरापर्यंत शोधमोहीम सुरू होती. त्‍याचा शोध लागलेला नाही.

बेकायदा चिरेखाण चालवून ती पावसाळ्यात उघडी टाकणाऱ्या संबंधित मालकावर कारवाई करावी, अशी मागणी संतप्‍त ग्रामस्‍थांनी केली. स्थानिक आमदारांनी घटनास्थळी जाऊन पाहणी केली.

उत्तम जलतरणपटू, तरीही... : बुडालेल्या राजचे पाण्यातील अचूक स्थान शोधण्यासाठी विशेष कॅमेऱ्याचा वापर करण्यात आला. हा खंदक खूपच खोल असून गेल्या दहा वर्षांपासून ती विनावापर आहे. राज लोटलीकर हा उत्तम जलतरणपटू होता. तरीही त्याचा बुडून मृत्यू झाल्याने हळहळ व्यक्त होत आहे. त्याच्यावर सोमवारी गोमेकॉत उत्तरीय तपासणी होईल. सातपैकी चौघेजण पाण्यात उतरले होते.