Sanjivani Suger Factory: संजीवनी साखर कारखान्यासमोर आंदोलन छेडणाऱ्या ऊस उत्पादक शेतकऱ्यांनी आता पणजीतील आझाद मैदानावर आंदोलन छेडण्याचा निर्णय घेतला आहे.

संजीवनी साखर कारखान्यासाठी ऊस देणाऱ्या शेतकऱ्यांनी इनेथॉल प्लांटची मागणी केली होती. मात्र सरकार यावर गंभीरपणे विचार करत नाही.

हे कळल्यावर आणि सरकारला स्पष्ट इशारा देऊनही मागण्या मान्य न झाल्यामुळे 02 जानेवारीपासून गोमंतक ऊस उत्पादक संघटनेच्या सदस्यांनी अखेर आंदोलनाला सुरुवात केली. हे आंदोलन आज म्हणजेच (5 जानेवारीला) तिसऱ्या दिवशीही सुरूच होते.

त्यामुळेच आता 8 जानेवारीपासून शेतकऱ्यांनी हे आंदोलन अधिकच तीव्र होण्याच्या दृष्टीने राजधानी पणजीत आझाद मैदानावर धरणे आंदोलन छेडण्याचा निर्धार केला आहे.

या आंदोलनात तब्बल 250 ऊस उत्पादक शेतकरी सहभागी होणार असल्याची माहिती मिळाली आहे. आमच्या मागण्या मान्य करा, कारखाना पूर्ववत चालू करा या मागण्यांसोबत ''जो पर्यन्त मुख्यमंत्री आमची दाखल घेत नाही, तोपर्यंत आंदोलन सुरूच राहणार'', असल्याचा एल्गार यावेळी आंदोलक शेतकऱ्यांनी केलाय.

याच बाबतीत काही दिवसांपूर्वी ऊस उत्पादक शेतकरी संघटनेचे अध्यक्ष राजेंद्र देसाई यांनी समिती सदस्यांसोबत झालेल्या बैठकीनंतर सरकारकडून आमच्या मागण्या पूर्ण झाल्या नाहीतर आंदोलनाचा इशारा दिला होता. त्याप्रमाणे शेतकऱ्यांनी एकजूट दाखवत आंदोलन सुरु केले आहे.