Mapusa: सध्या पेडे जंक्शन हे अपघातप्रवण क्षेत्र बनले असून भविष्याचा विचार करून हे जंक्शन पादचारी तसेच वाहतूकधारकांना ओलांडण्यासाठी (क्रॉसिंग) कामयचे बंद केले जाईल, अशी माहिती मंत्री नीलेश काब्राल यांनी दिली.

गुरुवारी आमदार जोशुआ डिसोझा यांच्यासोबत या जंक्शनची पाहणी केली. यावेळी नगरसेवक तारक आरोलकर, नगरसेवक विकास आरोलकर व इतर पदाधिकारी हे उपस्थित होते. या पाहणीनंतर मंत्री हे माध्यमांकडे बोलत होते.

पेडे जंक्शनवरील वाढते अपघात लक्षात घेता, हे जंक्शन क्रॉसिंगला बंद करणे उचित ठरणार आहे. जंक्शन बंद झाल्यास येथील स्थानिकांना थोडा त्रास होईल, त्यामुळे या रहिवाशांची उड्डाण पूलाची (ओव्हरपास) मागणी आहे.

जर दोन्ही बाजूने जागा उपलब्ध व एनओसी भेटल्यास आणि हा ओव्हरपास व्यवहार्य असल्यास आम्ही केंद्राकडून परवानगी आणू आणि गरजेनुसार ओव्हरपास बांधून देण्याची प्रशासनाची तयारी असल्याची ग्वाही नीलेश काब्राल यांनी दिली.

पर्यायी व्यवस्था करणार

आमदार जोशुआ डिसोझा म्हणाले, हे पेडे जंक्शन क्रॉसिंगला सध्या धोकादायक बनल्याने ते कायमचे बंद करण्याचे ठरविले आहे. त्यानुसार महामार्गच्या दोन्ही बाजूने सर्व्हिस रस्त्याचे काम पूर्ण केले जात आहे. त्यानंतर हे जंक्शन क्रॉसिंगला बंद होणार आहे. स्थानिकांसाठी पर्यायी व्यवस्था म्हणून ओव्हरपासचा प्रस्ताव आहे. यावर विचारविनिमय करून त्याची अंमलबजावणी करण्याचा आमचा प्रामाणिक प्रयत्न असणार आहे.