Mapusa Theft Case: गोव्यात मंगळवारी पहाटे एका अजब चोरीची घटना उघडकीस आली. चोरट्याने चोरी केली अन् तो चक्क त्याच हॉटेलमध्ये झोपी गेला. पहाटे कामगारांनी जेव्हा हॉटेल उघडले तेव्हा हा झोपलेला चोरटा सापडला.

विशेष म्हणजे या महाशयांनी एका हॉटेलच्या फ्रिजमधील बांगडा काढून तळून खाल्ल्याचेही उघडकीस आले. या इंटरेस्टिंग चोरीची घटना म्हापशातील ‘शांतादुर्गा' हॉटेलमध्ये घडलीय.

त्याच झालं असा कि, चंदन हरिहर दास (18, मूळ बिहार) हा चोरटा सोमवारी रात्री म्हापशातील ‘शांतादुर्गा' हॉटेलच्या बाहेरील पाण्याच्या टाकीवरून रोहिणी ब्यूटी पार्लरमध्ये घुसला. तिथे त्याला काहीच सापडले नाही. त्यामुळे रागाच्या भरात त्याने आतील सामान जाळले. पार्लरचे नुकसान केल्यानंतर तो पोटमाळ्यावरून शांतादुर्गा हॉटेलमध्ये उतरला.

हॉटेलच्या काऊंटरमध्ये रोकड नसल्याने तेही त्याने पेटवले. शिवाय सीसीटीव्ही कॅमेरे फोडले आणि तो हॉटेलमध्येच झोपला.

सकाळी कामगारांनी हॉटेल उघडताच त्यांना चंदन झोपलेला आढळला. कामगारांनी त्याला पकडले व चोप दिला. नंतर मालक स्वप्नील पेडणेकर यांना बोलावून पोलिसांच्या स्वाधीन केले.

या आधी त्याने म्हापसा बाजारपेठेतील हॉटेल समाधान, सन्मान हॉटेल व इतर दुकाने फोडल्याचीही माहिती मिळालीय. त्यात चोरट्याच्या हाती किरकोळ रोकड लागली होती.

संतोष बेळेकर यांच्या हॉटेल 'समाधान'मधील फ्रीजमध्ये ठेवलेला बांगडा त्याने काढला व तिथेच तळून खाल्ला. मासा खाल्ल्यानंतर त्याने तिथेच उलटी केल्याचे आढळून आले आहे.

या घटनेच्या पार्श्वभूमीवर म्हापसा व्यापारी संघटनेचे अध्यक्ष श्रीपाद सावंत, सचिव सिद्धेश राऊत, खजिनदार जितेंद्र फळारी व पांडुरंग सावंत यांनी पोलीस उपअधीक्षक जिवबा दळवी व निरीक्षक सीताकांत नायक यांची भेट घेऊन निवेदन सादर केले.