पणजी: गोव्यातील सुप्रसिद्ध मानकुराद आंब्याच्या दरानं यंदा उच्चांक गाठला असून, एका डझनासाठी तब्बल ६,००० रुपये मोजावे लागत आहेत. बाजारात मानकुराद आंब्याची उपलब्धता मर्यादित आहे, त्यामुळं या आंब्याचे दर आकाशाला भिडले आहेत.

सध्या बाजारात सुरुवातीचे मानकुराद आंबे दाखल झाले असून, त्यांना मोठी मागणी आहे. काही निवडक विक्रेत्यांकडेच मानकुराद आंबा सध्या उपलब्ध आहे. पुरवठा कमी असल्याने विक्रेत्यांनी किंमती वाढवल्या आहेत.

मागील वर्षी याच कालावधीत एका डझनासाठी काही प्रमाणात मानकुरादचा दर कमी होता, मात्र यंदा हा दर ६,००० रुपयांपर्यंत पोहोचला आहे.

मानकुराद आंब्याने गाठला उच्चांक

मानकुराद आंब्याने यंदा सर्वाधिक दर गाठत इतर सर्व प्रकारच्या आंब्यांना मागे टाकले आहे. सध्या एका डझनासाठी तब्बल ६,००० रुपये मोजावे लागत असून, हापूस, लालबाग, तोतापुरी आणि सिंदुरी आंब्याच्या तुलनेत मानकुराद महाग आहे.

गोव्यातील मानकुराद आंबा हा त्याच्या गोडसर चव, लुसलुशीत गर आणि अप्रतिम सुवासासाठी प्रसिद्ध आहे. त्यामुळे स्थानिक आणि पर्यटक या आंब्याला मोठ्या प्रमाणावर प्राधान्य देतात.

मार्चअखेर दर कमी होण्याची शक्यता

सध्या मानकुराद आंब्याची आवक खूपच कमी आहे, त्यामुळे दर प्रचंड वाढले आहेत. मात्र, मार्चअखेर किंवा एप्रिलच्या पहिल्या आठवड्यात उत्पादन वाढल्यास दर काही प्रमाणात कमी होऊ शकतात.