वास्को: मांगोरहिल येथे एका महिलेला पाळीव कुत्र्याने चावा घेऊन गंभीर जखमी केल्याने कुत्र्याचे नोंदणीकरण व भटक्या कुत्र्यांचे प्रश्न चर्चेत आले. त्या महिलेने पोलिस तक्रार केल्याने पोलिसांनी दोन महिलांविरोधात गुन्हा नोंद केला आहे.आता पोलिस व पालिका कोणती कारवाई करतात याकडे वास्कोवासियांचे लक्ष लागले आहे.

भटकी कुत्रे हाताळण्याचे काम पीपल्स फॉर अ‍ॅनिमल संस्थेला देण्यात आले आहे. त्यासाठी मुरगाव पालिका त्या संस्थेला निधी देते. भटक्या कुत्र्यांचे निर्बिजिकरण करण्याची मोहीम राबविण्यासाठी सदर संस्थेला निर्देश दिले आहेत, तसेच पाळीव कुत्रे ज्यांच्याकडे आहेत, त्यांचे नावे व पत्ते आम्हाला द्या आम्ही त्यांना कुत्र्यांची नोंदणी करण्यास भाग पाडू असे त्या संस्थेच्या प्रतिनिधींना सांगण्यात आले होते.त्यानंतर गेल्या वीस दिवसांत कितीजणांची नावे पालिकेला मिळाली ते स्पष्ट होऊ शकले नाही.

येथे पाळीव कुत्र्यांचे नोंदणीकरण व्हावे यासाठी जागरूकता मोहीम हाती घेण्याची गरज आहे. बरेचजण कुत्र्यांना इंजेक्शने वगैरे देतात की नाही याची कोणतीही नोंद नाही. जर पीपल्स फॉर अ‍ॅनिमल कुत्र्यांचे लसीकरण, निर्विजिकरण करते तर भटक्या कुत्र्यांची संख्या का वाढते असा प्रश्नही विचारण्यात आला.

परंतु देशी कुत्रे कोणीही दत्तक घेण्यास पुढे येत नसल्याचे उत्तर देण्यात आले होते. येथे मुरगाव पालिकेच्या कचरा संकलन केंद्रांचे कचरापेट्या रस्त्याकडेला ठेवण्यात येतात.त्यातील अन्नपदार्थ खाण्यासाठी भटकी कुत्रे, जनावरे येत असल्याचे चित्र पुन्हा दिसू लागले आहे.

मांगोरहिल येथे दोन महिलांनी त्यांचा पाळीव कुत्रा हेतुपुरस्सर लक्ष्मी पिल्लई हिच्या अंगावर सोडला.त्यामुळे त्या कुत्र्याच्या हल्ल्यात लक्ष्मी पिल्लई गंभीर जखमी झाली.एवढ्यावर न थांबता आणखी कुत्रे पाळण्याची धमकी देण्यात आली. यावरून कुत्रे पाळणाऱ्यांना कायद्याचे भय नाही का असा प्रश्न उपस्थित होतो. याला जबाबदार कोण याचाही विचार करण्याची गरज आहे.