म्हापसा: राज्यात यापूर्वी पिटबुल कुत्र्याच्या हल्ल्यात काहीजण जखमी झाल्याची प्रकरणे डोळ्यांसमोर असतानाच हळदोणेतील एकाने ज्येष्ठ नागरिकाच्या अंगावर जाणीवपूर्वक पिटबुल कुत्रा सोडल्याने ते गंभीर जखमी झाले. या घृणास्पद घटनेमुळे तीव्र संताप व्यक्त करण्यात येत आहे.

पोलिसांनी दिलेल्या माहितीनुसार, ११ नोव्हेंबर रोजी रात्री सुमारे ११ वाजण्याच्या सुमारास कुत्रा भुंकण्याच्या वादातून संशयित राहुल केरकर याचा शेजारी राहणारे ७० वर्षीय ज्येष्ठ नागरिक प्रदीप शिरोडकर यांच्याशी जोरदार वाद झाला. हा वाद नंतर विकोपाला गेला. संशयित राहुलने प्रथम शिरोडकर यांना अश्लील शिवीगाळ केली आणि नंतर घरातील फरशी पुसण्याच्या मेटल मॉपने (पाईपने) त्यांना जोरदार मारहाण केली. एवढ्यावरच न थांबता संशयिताने जाणीवपूर्वक आपला पाळीव पिटबुल कुत्रा त्यांच्या अंगावर सोडला.

यावेळी पिटबुल कुत्र्याने कडाडून चावा घेतल्याने प्रदीप शिरोडकर हे गंभीर जखमी झाले. याप्रकरणी प्रदीप यांचे भाऊ सुशांत शिरोडकर यांनी दिलेल्या तक्रारीच्या आधारे म्हापसा पोलिसांनी राहुल केरकरविरोधात भारतीय न्याय संहिता, २०२३ च्या कलम ३५२, ११८(२), २९१ तसेच ज्येष्ठ नागरिक संरक्षण कायद्याच्या कलम २४ अन्वये गुन्हा नोंदवला आहे. या प्रकरणाचा पुढील तपास पोलिस उपनिरीक्षक अमेय नाईक करत आहेत.

लोखंडी रॉडने केली मारहाण

खोईरुत - हळदोणे येथे कुत्र्याच्या भुंकण्यावरून झालेल्या क्षुल्लक वादाचे रूपांतर हाणामारीमध्ये झाले. कुत्रे भुंकत असल्याच्या रागातून राहुल केरकर याने ७० वर्षीय ज्येष्ठ नागरिकावर आधी लोखंडी रॉडने जोरदार हल्ला केला. नंतर त्यांच्या अंगावर आपला पिटबुल कुत्रा सोडून गंभीर जखमी केल्याप्रकरणी म्हापसा पोलिसांनी केरकर याच्यावर गुन्हा दाखल केला आहे.